Kigali: Umuyobozi w’ikigo n’umunyeshuri we bafatiwe muri Lodge bakekwaho gusambana

Chief Editor | 29-08-2016
Kigali: Umuyobozi w’ikigo n’umunyeshuri we bafatiwe muri Lodge bakekwaho gusambana

Umuyobozi w’ikigo cy’amashuri cya ES Kigoma giherereye mu karere ka Ruhango mu Ntara y’Amajyepfo, Kagabo Mansuet, afungiye kuri sitasiyo ya Polisi ya Remera mu mujyi wa Kigali nyuma yo gufatirwa mu macumbi (Lodge) ari kumwe n’umukobwa w’imyaka 19 y’amavuko, bikekwa ko bari barimo gusambana.

Sup Hitayezu Emmanuel, umuvugizi wa Polisi mu mujyi wa Kigali, yabwiye ikinyamakuru Ukwezi.com ko uwo muyobozi w’ishuri hamwe n’uwo mukobwa wiga ku kigo ayobora, bafatiwe mu macumbi yo mu karere ka Gasabo yitwa Upendo Lodge.

Sup Hitayezu avuga ko uyu mukobwa nawe afungiye kuri Sitasiyo ya Polisi ya Remera mu gihe iperereza rigokomeje ngo hashakishwe ibindi bimenyetso.

Hakurikijwe ingingo ya 244 mu gitabo cy’amategeko ahana ibyaha mu Rwanda, Kagabo Mansuet usanzwe afite umugore basezeranye, bimuhamye yaba yarakoze ubusambanyi kuko iyi ngingo ivuga ko ubusambanyi ari imibonano mpuzabitsina ikozwe n’uwashyingiwe ku buryo bwemewe n’amategeko, akayikorana n’uwo batashyingiranywe.

Ingingo ya 245 yo ivuga ko umuntu wese uhamwe n’icyaha cy’ubusambanyi, ahanishwa igifungo kuva ku mezi atandatu (6) kugeza ku mwaka umwe (1). Kandi iyi ngingo ihana n’uwo basambanaga, bisobanura ko n’umukobwa ashobora guhanwa kuko yujuje imyaka y’ubukure.

KANDA HANO UREBE VIDEOS UTASANGA AHANDI