Kwamamaza ko avura SIDA nibyo byatumye Mahoro atahurwa akatirwa imyaka 30

Chief Editor | 7-06-2016
Kwamamaza ko avura SIDA nibyo byatumye Mahoro atahurwa akatirwa imyaka 30

Mu minsi micye ishize, nibwo Ikinyamakuru Ukwezi.com cyabagejejeho inkuru yavugaga ko umugabo witwa Mahoro Isidore atavugwaho rumwe n’abaturage bari baturanye, bamwe bemeza ko afunganywe ubumenyi bw’umuti wa SIDA mu gihe hari abamufataga nk’umutekamutwe. Andi makuru ikinyamakuru Ukwezi.com cyamenye, ni uko uyu mugabo atitwaga Mahoro Isidore, ahubwo yari yarahinduye amazina ayobya uburari, kwamamaza ko Bikiramariya yamuhaye umuti wa SIDA bituma bamutahura.

Ahagana mu mwaka wa 2005, nibwo umugabo witwa Mahoro Isidore yamamaye mu Rwanda nyuma yo gutangaza ko yahawe umuti wa SIDA na Bikiramariya nyina wa Yezu w’i Nazareti. Yari atuye mu kagari ka Nyakarekare, mu murenge wa Mbuye ho mu karere ka Ruhango mu Ntara y’Amajyepfo.

Yaravuzwe aramamara cyane, kuva ubwo umuhanda Mbuye - Muhanga uba nyabagendwa, aboroheje n’abakomeye bamugana ari benshi maze nawe umuti awubahata atizigama, umugabo ahinduka umukire karahava, gusa Minisiteri y’Ubuzima iza kumuhagarika imubuza gukomeza gutanga iyo miti ngo izabanze ikorweho ubushakashatsi byemezwe koko niba yabasha gukiza SIDA ndetse ikaba nta n’ikindi kibazo yatera uwayinyweye.

Amakuru agera ku kinyamakuru Ukwezi.com, ashimangira ko kwamamara no kuvugwa cyane byatumye Mahoro Isidore aza gutahurwa, bimenyekana ko yagize uruhare rukomeye muri Jenoside yakorewe abatutsi, akimuka aho yabaga akajya gutura aha i Mbuye ndetse akanahindura amazina kugirango batazamutahura.

Mu gihe cya Jenoside yakorewe abatutsi na mbere yaho, yitwaga Nzeyimana Epaphrodite, nyuma abanza kwiyita Nzeyimana Isidore ariko arongera ashaka kuyahindura yose yiyita Mahoro Isidore. Uyu mugabo mbere yo kwimukira i Mbuye, akaba yari atuye mu cyahoze ari Komine Musambira yo muri Perefegitura ya Gitarama, ubu ni mu karere ka Kamonyi.

Nyuma yo kwivuga ibigwi by’uko avura SIDA, abo bari baturanye barimo abo yahekuye, baramumemye bamushinja uruhare yagize muri Jenoside, ndetse bamwe bemeza ko yari ahagararariye ishyaka rya CDR muri Komine Musambira, ibyaha biramuhama maze urukiko gacaca rw’i Musambira rumukatira imyaka 30 y’igifungo.

Mbere yo gukatirwa iyi myaka 30, yabanje gukatirwa gufungwa imyaka 12 ariko arajurira aba umwere, nyuma abamuregaga nabo bajurira bavuga ko yatanze ruswa ndetse n’inteko yamuburanishaga irahinduka, ahita akatirwa iyi myaka 30, ubu akaba amaze muri gereza imyaka isaga irindwi.

Kugeza n’ubu nyuma y’imyaka ari muri gereza, abatuye mu murenge wa Mbuye, iby’ubuvuzi bwe bamwe babifata nk’ukuri bakemeza ko afunganywe umuti wakiza SIDA bakanatanga ingero z’abatanze ubuhamya ko bakize bakanamugabira inka, mu gihe abandi bamwita umutekamutwe.

INKURU BIJYANYE: * Ruhango: Amayobera ku muturage bivugwa ko yafunganywe umuti uvura SIDA

KANDA HANO UREBE VIDEOS UTASANGA AHANDI