Leta y’u Rwanda yumvise ikibazo cy’umwana umaranye imyaka 16 uburwayi budasanzwe

Chief Editor | 3-06-2016
Leta y’u Rwanda yumvise ikibazo cy’umwana umaranye imyaka 16 uburwayi budasanzwe

Uyu mwana atega akabase munsi y’akananwa n’umunwa ngo hajyemo umwanda uva mu burwayi bwe

Nyuma y’inkuru twabagejejeho mu ntangiriro z’iki Cyumweru, ivuga ko umuryango utuye mu Kagari ka Gasarabwayi mu Murenge wa Musaza mu Karere ka Kirehe utabaza abagiraneza ubasaba kuwuha ubufasha bwo kuvuza umwana wabo umaranye imyaka 16 uburwayi budasanzwe bwo kubyimba umunwa n’ururimi, Leta y’u Rwanda ibinyujije muri Minisiteri y’Ubuzima yemeye gufasha uyu muryango.

Uwo mwana urwaye yitwa Tuyisenge Emile akaba afite imyaka 16 y’amavuko, ni mwene Gatabazi Jean Claude na nyina Ahobantegeye Groriose. Nyuma gato yo kuvuka, yagize uburwayi budasanzwe bw’umunwa, bituma ururimi rubyimba mu buryo budasanzwe, rusohoka inyuma.

Ababyeyi be bagerageje kumuvuza mu mavuriro yo mu Rwanda kugeza muri 2009, binaniranye boherezwa kujya kumuvuriza muri Afurika y’Epfo, ariko umuryango wabuze ubushobozi kugeza ubu muri 2016 kandi akomeza kumererwa nabi.

Uburwayi uyu mwana afite ntibusanzwe kandi hasabwa ubushobozi ababyeyi be batabona

Nyuma y’uko Ikinyamakuru Ukwezi.com cyanditse inkuru ivuga iby’uburwayi bw’uyu mwana n’ubushobozi bucye bw’umuryango we, umunyamakuru abinyujije kuri twitter yayisangije abayobozi bakuru b’u Rwanda barimo Perezida Kagame, Minisitiri w’Intebe Anastase Murekezi na Minisitiri w’Ubuzima Dr Agnes Binagwaho, bumva bwangu iki kibazo bashimangira ko umuryango urimo gufashwa.

Abinyujije ku rubuga rwa Twitter, Minisitiri w’Ubuzima mu Rwanda; Dr Agnes Binagwaho, yavuze ko bamaze kubwira ababyeyi b’uyu mwana ngo bazane umwana avurwe, abaganga bagomba kumufasha bakaba biteguye gukurikirana ikibazo cye.

KANDA HANO UREBE VIDEOS UTASANGA AHANDI