konka coffee
KONKA

AMAKURU

UKWEZI

Mayange: Twagirimana yarize araminuza kandi yandikisha amano kubera ubumuga

Mayange: Twagirimana yarize araminuza kandi yandikisha amano kubera ubumuga
30-08-2016 saa 17:57' | By Chief Editor | Yasomwe n'abantu 3846 | Ibitekerezo 4

Jean Twagirimana utuye mu murenge wa Mayange mu Karere ka Bugesera mu Ntara y’Uburasirazuba, abana n’ubumuga bw’amaboko ariko yashoboye kwiga arangiza icyociro cya gatatu cya Kaminuza (Masters) yandika akoresheje amano.

Uyu musore w’imyaka 31, yavukanye ubumuga bw’amaboko yombi adashobora kugira icyo ayakoresha, habe no gufata ikaramu. Nyamara avuga ko ibi bitamubujije kuminuza kandi amashuri ye yose akaba yarayize yandikisha amano haba ku rupapuro no kuri mudasobwa.

Yagize ati: "Nyuma yo kubona ko mfite ubumuga bw’amaboko ababyeyi bitabaje abahanga mu byiciro bitandukanye bababwira ko amaboko adashobora gukora ariko izindi ngingo zishobora gukora, banyigisha kwandika nkoresheje amano. Ni muri ubwo buryo bantoje gufata ikaramu mu mano, ntangira kwiga ndanatsinda, kugeza kuri uru rwego ndacyakoresha amano."

Akoresheje amano, abasha guhindaguranya impapuro z’ikaye, akanayakoresha mu kwandika. Muri Kaminuza yize umwuga wo kwigisha ariko ngo yaje kubona ko bidahagije.

Agira ati: "Amasomo nari nagiye gukurikirana ni amasomo y’uburezi budaheza; uburezi bw’abantu bafite ubumuga. Nahisemo kuba nakurikira aya masomo kubera ko nabonaga ko hari byinshi nkeneye kumenya naba ntarabonye ndetse maze kubona ko na barumuna banjye bagifite ibibazo nk’ibyo bashobora kuzanyura muri aya masomo."

JPEG - 49 kb

Si byose akoresha amano. Hari ibyo ashobora kwikorera birimo kuba yakoza mu kanwa akoresheje uburoso bw’amenyo, kwambara inkweto cyangwa kuzikuramo ndetse no kurya ariko byo ngo yakwirisha iyo ari mu rugo iwe gusa. Yarinze yiga amashuri yose adakoresheje amaboko mu kwandika.

N’ubwo bimeze gutyo ariko ngo ntibyamworoheye kubera ko aho agiye hose agomba kugira undi muntu umuherekeza mu kumufasha kumukorera ibyo we adashoboye.

Avuga ko nta vangura yigeze ahura na ryo ariko akumva hagombye kubaho ubuvugizi bukomeye bwakorerwa ababana n’ubumuga mu buryo bwo kubafasha ku isoko ry’umurimo.

Aha yagize ati: "Haracyarimo imbogamizi kuko kenshi usanga dukeneye ibikoresho bitandukanye n’ibyo abandi baba bafite mu kazi mu buzima busanzwe....Ubwo bufasha ntibuba buhari. Haracyari imbogamizi kuba abantu batari bamenya ibikoresho abantu bafite ubumuga bakeneye kugira ngo babashe kwinjira mu kazi."

Jean Twagirimana avuga ko ababana n’ubumuga bashoboye gufashwa mu myigire yabo bashobora guhangana mu nzego zitandukanye bikabarinda gusabiriza.

Iyi nkuru tuyikesha BBC.


Tanga Igitekerezo
Ibitekerezo 4
Cathoric Ingabire Kuya 5-09-2016

Bitubere Isomo, Ndetse n’undi wese ufite ubumuga wumva ko adashoboye yigane umuhate, byose birashoboka.

SABANI Kuya 31-08-2016

yaba byari bikunze iyi nkuru igakwirakwiza kumbunga nkoranyambaga zitandukanye inyigisho irimo yakubaka beshi bacitse intege badakora babifitiye ubushobozi

nishimwe Kuya 31-08-2016

Imana nishimwe kuko byose ibikora ifite impamvu niba ubyumva nkanjye vuga amen

Jane Kuya 31-08-2016

Ibi bitubere isomo. Ni gute umuntu yaba yandikisha amano akaminuza naho abafite amaboko n’amaguru bikabananira? Tubitekerezeho.

IGURIRE
Reba Ibindi Byinshi
konka Monaco
IBARUWA ZA JORIJI
Magic Pictures
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA