Mbuye, umurenge udasanzwe aho umuturage umwe agabirwa inka zirenga 30 umunsi umwe

Chief Editor | 31-08-2016
Mbuye, umurenge udasanzwe aho umuturage umwe agabirwa inka zirenga 30 umunsi umwe

Umurenge wa Mbuye, ni umwe mu mirenge icyenda igize akarere ka Ruhango mu Ntara y’Amajyepfo, ukaba ari umurenge wihariye ufite amateka yihariye mu bijyanye no kugabirana inka, aho ushobora gusanga umuturage umwe yahawe inka zirenga 30 umunsi umwe, nk’ikimenyetso cy’ishimwe ku bikorwa byiza yagiye akora.

Kuva cyera mu muco nyarwanda, kugabirana inka byari ikimenyetso cy’urukundo n’ubuvandimwe, ariko kandi kikaba igihango gikomeye ku wagabiye n’uwagabiwe. Muri Mbuye ho umuco umaze igihe kandi wamenyerewe na benshi, ni uwo kugabirwa ubushyo icyarimwe kandi gukura ubwatsi no gucyuza izo nka bigakorwa umunsi umwe mu birori by’igitangaza biba byahuruje benshi mu batuye uyu murenge.

Mu mezi macye ashize, uhereye mu mpera za 2015 ukageza hagati mu mwaka wa 2016, hari abantu benshi bagiye bahabwa inka nyinshi icyarimwe muri uyu murenge. Muri aba hari nka Ntegeyimana Fidèle wahawe inka 20, Gahamanyi Emmanuel wahawe inka 6, Bayavuge Theodath wagabiwe inka 12, Ndagijimana Sosthène wagabiwe inka 16, Twagirimana Alexandre wagabiwe inka 32 na Uwiringiyimana Jean Claude wagabiwe inka 34, ariko hari n’abandi batandukanye muri uyu murenge bagiye bagabirwa amashyo nk’uko n’ubuyobozi bw’uyu murenge wa Mbuye bubishimangira.

JPEG - 380 kb

Iyo habaye umuhango wo gucyuza inka, bisaba ko abazitanga bajya ku murongo. Iyo foto yafatiwe muri kimwe muri ibyo birori

Igikorwa cyabayemo kugabira umuturage wo muri Mbuye inka nyinshi kurusha izahawe abandi, ni icyabaye tariki 17 Mutarama 2016, aho byari ibirori bidasanzwe mu murenge wa Mbuye wose ndetse no mu nkengero zawo. Ibirori byo gucyuza izi nka byaranzwe n’ubuhamya, gushima no kugaragaza umutima udasanzwe uranga umugabo witwa Uwiringiyimana Jean Claude wahawe izi nka n’abaturage bagera kuri 29, ariko muri abo hakaba harimo bacye batanze inka ebyiri bityo zose hamwe zigera ku nka 34, ziherekejwe n’intama 5, amasuka, ibyansi zizakamirwamo n’ibindi byinshi, buri wese yatangaga bitewe n’uko yifite. Ibi birori byabereye mu mudugudu wa Gishari, mu kagari ka Gisanga ko muri uyu murenge wa Mbuye.

Ibi ariko ngo nta gitangaza abaturage n’ubuyobozi babibonyemo nk’uko byemejwe icyo gihe na Gahamanyi Emmanuel, umunyamabanga nshingwabikorwa w’akagari ka Mwendo ko muri uyu murenge wa Mbuye, ariko wayoboye igihe kirekire akagari ka Gisanga ibi byabereyemo ndetse akaba ari naho atuye, bivuga ko aturanye na Uwiringiyimana Jean Claude.

JPEG - 278.3 kb

Aha abaturage bahaga Uwiringiyimana Jean Claude inka ziherekejwe n’impano zimwifuriza ibyiza

Uyu yahamije ko kuba Uwiringiyimana Jean Claude yarahawe inka 34 n’ibindi byinshi yagenewe n’abaturage, atabibona nk’igitangaza bitewe n’uburyo asanzwe azi uyu mugabo. Yavuze ko abamuhaye inka ari abazirikanye ubugiraneza bwe, gufasha abatishoboye, kugira ibibazo by’abandi nk’ibye, koroza inka abakene badashoboye kuzigurira n’ibindi byinshi, bituma buri wese n’udafite inka yo kumuha yaragiye yifuza kumuha icyo yabasha kubona, ndetse akanamubwira ijambo ryo kumushimira mu ruhame, hakanatangwa ubuhamya by’ibikorwa bye muri rubanda, cyane cyane abatishoboye.

Mbere yaho gato nabwo inka zenda kungana n’izi zari zatanzwe. Tariki 6 Ukwakira 2015, Twagirimana Alexandre uyobora Njyanama y’uyu murenge akaba anamaze imyaka 10 ari Chairman w’Umuryango RPF Inkotanyi mu murenge wa Mbuye, nawe yagabiwe inka zigera kuri 32 kandi nawe yazicyuje umunsi umwe mu birori byari byahuruje imbaga. Uyu yaganiriye n’ikinyamakuru Ukwezi.com, avuga ko ibi bimaze kuba umuco wihariwe n’umurenge wa Mbuye ariko kandi ukaba ari umuco ufite byinshi ushamikiyeho.

Twagirimana Alexandre, avuga ko muri uyu murenge hari gahunda nyinshi zihuza abaturage barangajwe imbere n’ubuyobozi, zigamije kurushaho kunga ubumwe, urukundo n’imibanire, kurwanya amacakubiri n’umwiryane ariko kandi hakabamo na gahunda yo kugoboka abatishoboye, kandi ibi bikaba ari umwihariko usanzwe wiyongera kuri gahunda za Leta zisanzwe ziri mu mirenge yose. Urugero atanga, ni nk’icyitwa "Igicumbi cy’umuco" aho abaturage bishyize hamwe, bakaba baterana buri cyumweru cya nyuma cy’ukwezi bakaganira, ufite ikibazo runaka akakigeza kuri bagenzi be bagahita bateranya amafaranga bakamufasha kugikemura. Avuga kandi ko hari n’ubundi bwitange abaturage ubwabo bagira bakishyira hamwe bagafasha bagenzi babo batishoboye.

JPEG - 152.3 kb

Twagirimana Alexandre (uri imbere hagati wambaye ingofero) ni Chairman wa FPR Inkotanyi mu murenge wa Mbuye

Ku bijyanye n’uburyo abaturage bagabirana ubushyo kandi bigakorwa umunsi umwe, Twagirimana Alexandre avuga ko biterwa ahanini no kuba abaturage baba basanzwe bafitanye ubumwe n’urukundo hagati yabo, kuburyo nk’iyo bari kumwe hakagira uha mugenzi we inka n’abandi bumva batatangwa kubera ibikorwa n’imyitwarire bazi kuwo bumvise wahawe inka, kuva ubwo nabo bakagenda bemera kuzatanga inka bityo ugabirwa akazabamenyesha umunsi bahuriraho bose bakazimugabira, kandi zigahita zitaha uwo munsi w’ibirori ntizibe inka zitangwa mu magambo gusa.

Iyo uganiriye n’abaturage benshi bo mu murenge wa Mbuye ariko, bakubwira ko uyu muco wabo umaze imyaka myinshi n’ubwo wagiye waguka. Hari abatari bacye bakomoza ku murage mwiza basigiwe n’umugabo umaze imyaka ine atabarutse, uyu akaba yarigeze kuyobora Segiteri Mbuye mbere bitarahinduka Umurenge.

Uyu yitwaga Musengimana Cyprien ariko muri segiteri Mbuye hose bamwitaga Rugamba, nk’ikimenyetso cy’uko ubupfura, ubutwari n’ubunyangamugayo bye byabanganiraga iby’umuhanzi Rugamba Cyprien watabarutse muri Jenoside yakorewe abatutsi. Uyu Musengimana Cyprien yatabarutse tariki 9 Nzeri 2012 azize indwara, mbere akaba yari yarabaye konsiye wa Segiteri Mbuye mu gihe cy’imyaka isaga 8.

JPEG - 1.2 Mb

Musengimana Cyprien yamamaye mu murenge wa Mbuye ku izina rya Rugamba

Musengimana Cyprien, ni umwe mu bashimwe na Perezida Paul Kagame mu mwaka wa 2010 mu muhango wabereye muri Serena Hotel yo ku Gisenyi, we n’abo bagenzi be bakaba barashimiwe uruhare bagize muri gahunda ya "Gira Inka Munyarwanda", ariko by’umwihariko uyu we akaba yari yaratangije gahunda yo kugabira abaturage ba Mbuye guhera nyuma gato ya Jenoside, akaba yaratabarutse amaze kugabira abaturage barenga 100.

Uyu kandi yagiye yunganirwa n’abandi bagabo barimo Belgique Edouard bakunda kwita Pasteur, uwitwa Ramadhan n’abandi benshi bagiye bafasha abaturage batari bacye b’umurenge wa Mbuye babagabira inka, nyuma abaturage nabo bakagenda babitura babashimira umutima mwiza babagaragarije.

KANDA HANO UREBE VIDEOS UTASANGA AHANDI