Menya byinshi ku mateka yihariye n’ubuzima bwa Bazivamo Christophe wakiniye Rayon Sports

Chief Editor | 23-08-2016
Menya byinshi ku mateka yihariye n’ubuzima bwa Bazivamo Christophe wakiniye Rayon Sports

Bazivamo Christophe, ni umwe mu banyepolitiki b’abanyarwanda bamaze igihe kirekire mu myanya itandukanye y’ubuyobozi. Yabaye Minisitiri anabona indi myanya itandukanye y’ubuyobozi, irimo no kuba Visi Perezida w’ishyaka rya FPR Inkotanyi. Kimwe mu byo yihariye, ni ukuba yarakiniye ikipe y’umupira w’amaguru ya Rayon Sports.

Bazivamo Christophe yavukiye mu cyahoze ari Komine Cyungo, ubu ni mu murenge wa Rukoze mu Karere ka Rulindo mu Ntara y’Amajyaruguru. Yavutse mu mwaka w’1961, bivuga ko ubu afite imyaka 55 y’amavuko. Bazivamo yize amashuri abanza aha ku ivuko, ayisumbuye ayakomereza muri Lycee de Kigali benshi bakunda kwita LDK.

JPEG - 192.7 kb

Yakomereje amasomo ya Kaminuza muri Kaminuza y’u Rwanda i Butare mu karere ka Huye, aho yarangije afite impamyabumenyi y’icyiciro cya kabiri mu bijyanye n’ubuhinzi. Yahise bakomereza mu gihugu cy’u Budage muri “The University of Göttingen” aho yakuye impamyabumenyi y’icyiciro cya gatatu cya Kaminuza n’ubundi mu bijyanye n’ubuhinzi ariko yibanda ku gashami k’ibijyanye n’ubukungu n’iterambere ry’icyaro.

Aho yigaga hose, Bazivamo Christophe yari umuhanga mu ishuri ariko akaba n’umukinnyi ukomeye w’umupira w’amaguru. Yakinnye umupira ubwo yakiniraga ibigo by’amashuri mu mashuri yisumbuye ndetse aza no gukina mu cyiciro cya kabiri, akaba n’umukinnyi wa Komine Cyungo. Ageze muri Kaminuza nabwo yakomeje gukina, aza gukinira ikipe ya Kaminuza y’u Rwanda kugeza ubwo ikipe ya Rayon Sports yaje kumubonaho ubuhanga imusaba ko yayikinira, akaba yarakinnyemo igihe cy’imyaka ibiri, mu 1985 no mu 1986.

JPEG - 259.3 kb

Bazivamo Christophe yabaye umukinnyi ukomeye w’umupira w’amaguru

Nk’umuntu wari warize ibijyanye n’ubuhinzi, Bazivamo yakoze imirimo inyuranye mu buhinzi mbere yo kwinjira muri Politiki. Mbere ya Jenoside yakorewe abatutsi, yakoraga akazi k’ubugoronome aho yakoreye muri Komine Kanama, Komine Mutura na Komine Rwerere

Mu bijyanye n’imirimo ya Politiki, Bazivamo Christophe yabaye Perefe w’icyahoze ari Perefegitura ya Gitarama, kuva mu 1999 kugeza mu mwaka w’2000. Kuva mu 2000 kugeza mu mpera za 2002, yari Umunyamabanga Nshingwabikorwa wa Komisiyo y’Igihugu y’Amatora.

JPEG - 235.6 kb

Kuva ubwo muri 2002 kugeza muri Gicurasi 2011 yari Minisitiri, aho yabaye Minisitiri w’Ubutegetsi bw’igihugu, Minisitiri w’Umutekano mu gihugu, Minisitiri w’Ubutaka, ibidukikije, amashyamba, amazi n’ubucukuzi bw’amabuye y’agaciro, aza kuba Minisitiri w’Ubuhinzi n’ubworozi, aba na Minisitiri w’amashyamba n’ubucukuzi, byose bijyanye ahanini n’uko hari Minisiteri zagiye zihindurirwa amazina n’ingano y’inshingano.

JPEG - 49.3 kb

Guhera muri 2011, Bazivamo Christophe yabaye umudepite mu Nteko y’Umuryango w’Ubumwe bw’Ibihugu bya Afurika y’i Burasirazuba “EALA” aho yari ahagarariye u Rwanda, kugeza hagati muri uyu mwaka wa 2016 ubwo yagirwaga umunyamabanga mukuru wungirije ushinzwe imari n’imiyoborere mu muryango w’ibihugu bya Afurika y’Iburasirazuba. Nyuma y’iyi myanya ya Politiki yose ariko, kuva mu mwaka wa 2002 yari na Visi-Perezida w’umuryango FPR-Inkotanyi kugeza n’ubu.

Umugore wa Bazivamo ubu babana, ni murumuna w’umugore we wa mbere...

Ubwo Jenoside yakorewe abatutsi yabaga mu Rwanda mu mwaka w’1994, yahitanye umugore wa Bazivamo Christophe, abana babiri bari barabyaranye hamwe na muramu we bose biciwe ku Gisenyi. Jenoside kandi yamutwaye murumuna w’umugore we wari umwana w’imyaka 12 wicanywe n’abakozi bo mu rugo. Icyo gihe, Bazivamo we yari yaragiye kwiga mu Budage. Imfura ye yitwaga Ikirezi yishwe ifite imyaka ibiri n’amezi atatu, mu gihe umuto wicanywe na nyina amuhetse we yari afite amezi abiri n’ibyemweru bitatu.

JPEG - 50.8 kb

Nyuma ya Jenoside yakorewe abatutsi, Bazivamo Christophe yakomeje igihango yari afitanye no kwa sebukwe kandi bakomeza kugirana umubano n’ubucuti, bigera ubwo ashaka murumuna w’umugore we wa mbere, ubu niwe mugore babana ndetse bafitanye abana bane.

KANDA HANO UREBE VIDEOS UTASANGA AHANDI