konka coffee
KONKA

AMAKURU

UKWEZI

Menya byinshi kuri Kizito Mihigo wizihiriza isabukuru y’imyaka 35 muri gereza ya 1930

Menya byinshi kuri Kizito Mihigo wizihiriza isabukuru y’imyaka 35 muri gereza ya 1930
25-07-2016 saa 04:34' | By Chief Editor | Yasomwe n'abantu 20887 | Ibitekerezo 22

Kizito Mihigo ufungiye muri Gereza Nkuru ya Kigali ahazwi nko muri 1930, arizihiriza muri gereza nkuru ya Kigali isabukuru y’imyaka 35 amaze avutse. Kizito Mihigo, ari mu Banyarwanda bavuzwe cyane mu myaka nk’itandatu ishize, akaba yarabanje kuvugwa kubera ibikorwa byiza yamenyekanyeho ariko akaza no kuvugwa cyane mu gihe yari akurikiranyweho ibyaha birimo no gucura umugambi wo kwica umukuru w’igihugu.

Umuhanzi Kizito Mihigo yavutse kuwa Gatandatu, tariki ya 25 Nyakanga 1981, avukira i Kibeho, umwe mu mirenge y’akarere ka Nyaruguru, mu cyahoze ari perefegitura ya Gikongoro, ubu ni mu Ntara y’Amajyepfo y’u Rwanda.

Ni umwana wa gatatu mu muryango w’abana batandatu. Ababyeyi be Buguzi Augustin na Ilibagiza Placidie, bamureze mu bukristu gaturika. Ubwo yari afite imyaka 9 y’amavuko, Kizito Mihigo yatangiye guhimba uturirimbo tw’abana, maze nyuma y’imyaka itanu, aza kuvamo umuhanzi w’indirimbo za Kiriziya Gaturika wamamaye mu Rwanda. Mu mwaka w’1994, Se umubyara (Buguzi Augustin) yishwe muri Jenoside yakorewe abatutsi. Kizito Mihigo yagiye avuga kenshi ko Jenoside yakorewe abatutsi iri mu byamuhaye inganzo y’ubutumwa yaje kujya aririmba.

JPEG - 102.6 kb

Ku myaka 14, ubwo yigaga mu mwaka wa mbere wa Seminari Nto ya Karubanda i Butare, yahimbye indirimbo nyinshi ziririmbwa muri Kiliziya Gaturika mu Rwanda kugeza n’uyu munsi. Mu mwaka wa 2000, (ubwo yari afite imyaka 19), Kizito Mihigo yari afite indirimbo zirenga 200 za Misa.

Abifashijwemo n’ubuyobozi bukuru bw’igihugu, mu mwaka wa 2003 yagiye kwiga muzika i Burayi, maze mu kwezi kwa Nzeri 2008, aza kubona impamyabumenyi DFE « Diplôme de Fin d’Etudes», mu ishuri rya Conservatoire de Musique de Paris.

JPEG - 51.1 kb

Yigishije muzika mu ishuri ryisumbuye « Institut provincial » ryo mu Bubiligi, kuva mu mwaka wa 2008 kugeza muri 2010. Kuva yagera ku mugabane w’u Burayi, uyu muhanzi yatangiye guhimba n’izindi ndirimbo zitari iza Kiliziya, ahubwo zitanga ubutumwa bwubaka umuryango nyarwanda, bwunga kandi bubasaba kwihesha agaciro.

Umuhanzi Kizito Mihigo yashinze kandi Umuryango KMP (Fondation Kizito Mihigo pour la Paix / Kizito Mihigo for Peace Foundation) aha uyu muryango intego yo guharanira amahoro n’ubumuntu mu bantu hakoreshejwe impano n’ubugeni bya gihanzi.

JPEG - 190.7 kb

Mu mwaka wa 2011, Umuryango Imbuto Foundation wa Madamu Jeannette Kagame, wamuhaye igihembo nk’umunyarwanda ukiri muto wabashije gukora ibikorwa by’ubuhanzi byagize uruhare mu kwimakaza amahoro, ubumwe n’ubwiyunge.

JPEG - 101.6 kb

Paji y’ubuzima bwa Kizito Mihigo yaje guhinduka kandi bitungura benshi muri Mata 2014, ubwo byatangiraga kuvugwa ko uyu musore yaba yarafatanyije n’abarwanya Leta y’u Rwanda, mu gucura umugambi wo kwica bamwe mu bayobozi bakuru b’u Rwanda barimo na Perezida Paul Kagame. Icyaje kurushaho gutungurana, ni uko Kizito Mihigo yiyemereye ibi byaha.

Ubwo Kizito Mihigo yagezwaga bwa mbere imbere y’urukiko, yahise yemera ibyaha byose aregwa ndetse aboneraho no gusaba imbabazi umukuru w’igihugu. Icyo gihe yagize ati: “Nsabye imbabazi. Nzi ko igihugu cyacu kiyoborwa n’abantu bafite umutima ntabwo kiyoborwa n’ibikoko, bababariye kugeza no kubishe abandi muri Jenoside. Nongera gusaba imbabazi mpereye ku buyobozi bw’igihugu, Perezida wa Repubulika musaba imbabazi mubwira ko nta kibi mwifuriza. Mbizeza ko nkiri wa wundi n’ubwo icyaha cyaje kikankubita hasi, nimbona imbabazi, nzereka Abanyarwanda imigambi yanjye no kurushaho gushimangira ibyiza nakoze mbere.”

JPEG - 33.6 kb

Kizito yiyemereye ibyaha ataruhanyije anasaba ko yahabwa imbabazi n’umukuru w’igihugu agasubira mu muryango nyarwanda kwerekana ko yahindutse

Ubwo yasabirwaga gufungwa burundu, Kizito Mihigo yongeye kugaragaza ko agisaba imbabazi Perezida wa Repubulika n’umufasha we ku magambo mabi yabavuzeho, asaba imbabazi abacitse ku icumu rya Jenoside bose, ndetse anisegura ku buyobozi bw’igihugu n’Abanyarwanda muri rusange, aho yasabaga ko yahabwa amahirwe agasubira mu muryango nyarwanda gukosora amakosa yakoze.

JPEG - 145.3 kb

Kuwa Gatanu tariki 27 Gashyantare 2015, nibwo urubanza ubushinjacyaha bwaregagamo Kizito Mihigo na bagenzi be rwasomwe, abo bakaba ari Agnes Niyibizi, Ntamuhanga Cassien na Dukuzumuremyi Jean Paul, bakaba bose bari bakurikiranweho ibyaha by’ubugambanyi bwo kugirira nabi ubutegetsi buriho cyangwa umukuru w’igihugu, gucura umugambi w’ibikorwa by’iterabwoba no gufasha kurema umutwe w’abagizi ba nabi. Nyuma yo guhamwa na bimwe muri ibi byaha Kizito Mihigo akaba yarahise akatirwa igifungo cy’imyaka 10. Gusa yahise ajurira, kugeza ubu bikaba bitegerejwe ko azongera akagezwa imbere y’urukiko rw’ikirenga aburanishwa kuri ibi byaha.

Kizito Mihigo wizihiza isabukuru y’imyaka 35 kuri uyu wa Mbere tariki 25 Nyakanga 2016, byari biteganyijwe ko iyo atajurira, yari kuzarangiza igihano cye muri 2024, ni ukuvuga igihe azaba afite imyaka isaga 43 y’amavuko. Gusa ibi byaba mu gihe nta nsimburagifungo, insubikagifungo cyangwa imbabazi yaba yahawe.


Tanga Igitekerezo
Ibitekerezo 22
toroni Kuya 10-12-2016

na njye musabiye imbabazi kandi n’ Imana yaramubabariye

keza Kuya 30-11-2016

Nukuri humura imana niyo nkuru komera muhungu mwiza

nathalie mugeni Kuya 25-11-2016

happy birthday ntakundi byagenda gusa ugo mba gusaba imbanazi bro

twagira Kuya 16-11-2016

Mwiriwenamamvuyokubabarirwakukokonawenamuhweyari kukonawenamukweyagiriye abandi.

sisi Kuya 10-11-2016

eeeeeeeee aliko kuki mwikunda? Yakora ,Iki kindi? Atari amatakira ngoyi ? simvuze ngo nabambwe ,aliko nahanwe ! bibere nabandi isomo ! sentiment mubugambanyi no ! please ! ikindi ijambo interahamwe ubwaryo ntiryari ribi,ryagizwe ribi nibikorwa,so numva umuntu yamwita uko abyumva bijyanye nibyo yakoze ! nabanze atekereze neza kucyo yaragiye gukora ! kandi ikindi mwitonde we iyagahanze niyo ikamena ,bangahe babaye interahamwe bitari bikwiye ! umubisha ntagira isura !

kiki Kuya 30-10-2016

Mwiriwe!!!!Kubwo uko Kizito yagaragaje umutima wo kwicuza ku Mana no kubantu ndetse no kubuyobozi bw’igihugu rwose akwiye kubabarirwa.guhemuka yarahemutse ariko mpamya ko ari Imbaraga z’umwanzi wacu Satani zatumye ayoba kandi mwibuke ko Kizito yasebeje Satani igihe kirekire rero nawe am uciyeho urwaho yagombaga kumusebya.

jojo Kuya 22-10-2016

ko mutansubiza

jojo Kuya 22-10-2016

kagame niba utekereza babarira kizito mihigo umubyeyi we arababaye kandi natwe turababate

Robert Kuya 19-10-2016

mihigowe bazamufungu burundi kuberako ntahataniye na kayumba

fils mungeri Kuya 29-09-2016

mubabari re Nina ukunda igihugucyawe

Bweyeye Kuya 26-07-2016

@Alias na @Cyubahiro Bryan, ntimukihutire guca imanza kuko namwe uwashaka kubakatira urubacisha umutwe ntiyabura icyo aheraho. @Cyubahiro Bryan nkwibarize: Ese Kizito yateganya kwica Nyakubahwa mu buhe buryo? Mu rukiko badubanuriye ko yamuvuzeho amagambo mabi...mujye mureka guhubuka mubanze mumenye ibyo muvuga. Ngo Kizito Mihigo ni interahamwe? Ese uzi icyo interahamwe zakoze muri iki gihugu sha? Reka ngucire imigani ibiri Bryan we: 1: Isi ntisakaye ntawe utanyagirwa. 2: Ubamba isi ntakurura.

ALIAS Kuya 26-07-2016

Ishyano yagushije riragatsindwa,nabohwe niba yarisubiyeho azabohorwe.

cyubahiro Bryan Kuya 26-07-2016

ubundise uwo wiyita Bweyeye arinda avuga ibyo bigambo ngo abanye gute n’interahamwe buriya hari interahamwe iruta kizito?? njye nasanze interahamwe mbi ari kizito!!! mbi cyanee kandi irya izindi! niwe kizigenza ahubwo arenze n’interahamwe umuntu ushaka kwica Paul KAGAME ubwo wamwita interahamwe gusa bikaba bihagije koko?????? nabambwe

Theoneste Kuya 26-07-2016

Uyu mugabo tumusabiye imbabazi rwose kandi nawe yarazisabye cyane ko n’icyaha yacyemeye. Abayobozi bacu rwose cyane cyane perezida wacu niba mushobora kubona ubu butumwa mumubabarire isomo yararibonye kandi turizera ko atazongera rwose. Imana nayo imibabarire

Bweyeye Kuya 26-07-2016

Iminsi amaze muri prison ndahamya ko yamwigishije. Ahasigaye ndumva nawe twamuha amahirwe yo kubaho...hato interahamwe zitazatwishimiraho di ....ese Ubu abanye âte nazo mu buroko?

kamali Kuya 25-07-2016

hhhh, ahubwo yagaruka kuyobya abanyarwanda, ubundi c yajyaga muri ayo yabuze iki?

Kilo kilo Kuya 25-07-2016

President niba koko ari umubyeyi wa bose adufungurire Kizito, tumwigireho byinshi, hamwe n’iri somo azakura muri gereza.

ibyiza Kuya 25-07-2016

Mubyukuri dufite umuyobozi wumuhanga pe, ndizerako azababarira kizito, kuko yabonye isomo navugako ari satani wari wamuteye. Gusa niyo yababarirwa azamenyeko usibye nawe nundi uwariwe wese ko urwanda ruyobowe nabahanga kuburyo ntawarujegajeza ngo bikunde.

akariza kezaorgan Kuya 25-07-2016

Isabukuru nziza humura tuza kumutima warababariwe kd n’Imana yarakubabariye twizeye neza ko igihe kumwe tuzongera kukubona tukishimana kd courage turacyagukunda

savio Kuya 25-07-2016

Ba Nyakubahwa muyoboye igihugu cyacu cyane Prezident wa Repuburika tukuzi nk’Umubyeyi babarira Kizito Mihigo ndumva nawe amaze kubona isomo

Mbabazi Kuya 24-07-2016

Musabiye imbabazi ku mana no ku bantu...nukuri nibamworohereze

Ruboneza Kuya 24-07-2016

Uyu mugabo Imana imufashije akagaruka muri société ndahamya ko yagira akamaro...kuko yaba yararungurutse i kuzimu. Reka tubirekere abadukuriye. Tubasabye ubushishozi, murakoze.

IGURIRE
Reba Ibindi Byinshi
konka Monaco
IBARUWA ZA JORIJI
Magic Pictures
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA