Muhima: Nyuma y’igihe asama inda zikavamo, yibarutse abana bane icyarimwe

Chief Editor | 9-07-2016
Muhima: Nyuma y’igihe asama inda zikavamo, yibarutse abana bane icyarimwe

Mugarura Jean Baptiste w’imyaka 31 y’amavuko na Mujawayezu Alphonsine w’imyaka 32, bibarutse abana bane b’impanga, nyuma y’igihe bifuza umwana ntibibahire kuko hari inda zagiye zivamo. Kuri uyu wa Gatandatu tariki 9 Nyakanga 2016, nibwo bumvise inkuru nziza bakabwirwa n’abaganga ko abana babo uko ari bane bavukanye ubuzima bwiza.

Ubwo ikinyamakuru Ukwezi.com cyasuraga uyu muryango ukiri mu bitaro bya Muhima mu mujyi wa Kigali aho babyariye, Mugarura Jean Baptsite yadutangarije ko ari ibyishimo bikomeye mu muryango wabo, bikaba ari n’igitangaza bashimira Imana. Avuga ko umufasha we Mujawayezu Alphonsine yari amaze igihe asama inda zikavamo, none Imana ikaba yabashumbushe.

Mugarura Jean Baptiste, asanga abana bane Imana yabahaye ari nk’igitangaza yabakoreye

Mugarura avuga ko bakabaye barabyaye imbyaro enye ariko inda zikaba zaragiye zivamo, gusa bakaba bari bafite umukobwa w’imfura ufite imyaka ibiri y’amavuko ariko mbere na nyuma ye hakaba haravuyemo inda, bakomeza kwihangana no kwizera Imana kugeza ubwo Mujamayezu Alphonsine yasamaga iyi nda y’abana bane b’impanga. Abaganga bamusuzuma atwite, bari barabonye abana batatu ariko ubwo yabyaraga, nibwo babonye ko yari atwite abana bane.

Mujawayezu Alphonsine wibarutse abana bane b’impanga

Aba bana bane, barimo abakobwa batatu n’umuhungu umwe. Bavukanye ubuzima bwiza, n’ubwo bahise bashyirwa mu byuma bibafasha guhumeka neza, ariko abaganga b’ibitaro bya Muhima batangarije ikinyamakuru Ukwezi.com ko biteganyijwe ko batazatindamo kuko nta kibazo bavukanye. Umubyeyi yabyaye abazwe, ariko nawe ubuzima bwe bumeze neza nta kibazo.

Aba bana bavukanye ubuzima bwiza, aha bari mu byuma bibafasha guhumeka neza

Mugarura Jean Baptiste na Mujawayezu Alphonsine, basanzwe ari abaturage b’umurenge wa Nyamiyaga mu karere ka Kamonyi. Kuba basanzwe ari abahinzi bafite ubushobozi buciriritse, byongeye bakaba bashobora kuzajya bamara umwanya munini bita kuri aba bana, Mugarura avuga ko abona bitazaborohera muri iyi minsi kubona ibizatunga aba bana no kwita ku mubyeyi, agasaba ubuyobozi bw’akarere ka Kamonyi kubafasha kubona amata yo kubaha.

Gusa biri amahire, kuko ubwo twaganiraga na Udahemuka Aimable, umuyobozi w’akarere ka Kamonyi , yadutangarije ko yamaze kumenya iby’uyu mubyeyi wo mu karere ayobora wibarutse abana bane, kandi akarere kakaba kiteguye kubafasha. Avuga ko hari inza zagarujwe muri gahunda ya Girinka bagomba guhamo uyu muryango imwe muri zo, kandi akaba ateganya kuganira n’umuyobozi w’akarere wungirije ushinzwer imibereho myiza y’abaturage bakareba icyo babafasha kirimo no kuba batangira kubakamishiriza abana bakabanza bakigira ejuru.

Uyu muyobozi w’akarere ka Kamonyi anavuga ko nka Nyobozi y’akarere bamaze no gupanga kuzasura uyu muryango aho bari mu bitaro bya Muhima, mu rwego rwo kurushaho kubaba hafi no kwifatanya nabo mu byishimo by’abana bibarutse.

KANDA HANO UREBE VIDEOS UTASANGA AHANDI