Nyamirambo: Umukobwa bikekwa ko ari indaya yishe umusore

Chief Editor | 2-09-2016
Nyamirambo: Umukobwa bikekwa ko ari indaya yishe umusore

Mu gicuku cyo kuri uyu wa Kane tariki 1 Nzeri 2016, hagati ya saa sita na saa saba z’ijoro, umusore yakubitiwe icupa ry’inzoga mu kabari n’umukobwa bikekwa ko yari indaya, ahita agwa hasi mu kanya gato ashiramo umwuka. Ibi byabereye i Nyamirambo, mu murenge wa Gitega mu gace k’aho bakunze kwita kwa Mutwe.

Bamwe mu baturage bivugira ko bari muri aka kabari, babwiye ikinyamakuru Ukwezi.com ko umukobwa witwa Byukusenge Saddah usanzwe akora umwuga w’uburaya i Nyamirambo, ari we wishe uwo musore wari uzwi ku izina rya Kayanza. Bavuga ko Kayanza yinjiye mu kabari agasangamo abantu benshi barimo n’uwo mukobwa, akanenga imyambarire ye kuko yari yambaye impenure, undi agahita amukubita icupa yari arimo kunyweramo inzoga.

Amakuru y’urupfu rwa Kayanza yanemejwe n’umuvugizi wa Polisi y’u Rwanda mu mujyi wa Kigali, SP Emmanuel Hitayezu, wabwiye ikinyamakuru Ukwezi.com ko kugeza ubu hakirimo gukorwa iperereza ariko hagati aho Byukusenge Saddah akaba yatawe muri yombi, akaba afunganywe n’umusore witwa Mihigo Salim bombi bakaba barimo kubazwa na Polisi kuri iki cyaha, mu gihe umurambo w’uwishwe wo wajyanywe ku bitaro bya Kacyiru.

Icyakoze SP Hitayezu Emmanuel avuga ko ntacyo babona nka polisi bashingiraho bemeza ko uwo mukobwa koko yari indaya, ikindi kandi bakaba bataramenya neza icyo uwishwe yakubiswe kuko bamwe babwiye Polisi ko ari icupa abandi bakayibwira ko ari turunevisi (tourne vis). Andi makuru Polisi yabashije kumenya, ni uko uyu Kayanza yinjiye mu kabari avuye ahandi hantu yari amaze kwiba telefone igendanwa

KANDA HANO UREBE VIDEOS UTASANGA AHANDI