’Nyirakuru’ w’abazunguzayi umaze imyaka 35 acuruza agataro, yasutse amarira imbere ya Minisitiri

Chief Editor | 11-05-2016
’Nyirakuru’ w’abazunguzayi umaze imyaka 35 acuruza agataro, yasutse amarira imbere ya Minisitiri

Mu nama yahuje abazunguzayi ba Nyabugogo n’abayobozi barimo Minisitiri w’uburinganire n’umuryango, umuyobozi w’akarere ka Nyarugenge, ushinzwe imibereho myiza y’abaturage mu mujyi wa Kigali n’abandi batandukanye, niho umukecuru w’imyaka 64 witangarije ko ari nyirakuru w’abazunguzayi ba Nyabugogo, yagaragarije agahinda amaranye imyaka, kwihangana biramunanira araturika ararira.

Ubwo abazunguzayi bahabwaga umwanya ngo bagende babaza ibibazo byabo, buri wese yagendaga avuga ikimushengura umutima, abenshi bakaba baragarutse ku kuntu bafungwa, bagakubitwa, bakamburwa ibyabo ndetse by’umwihariko bagaruka ku rupfu rw’umwe muri bagenzi babo wiciwe muri gare ya Nyabugogo tariki 7 Gicurasi 2016.

Ababazaga ibibazo banatanga ibitekerezo, wumvaga koko harimo abababaje, ariko byageze ku mukecuru witwa Nyirabambogo Martha biba ibindi, bamwe birabarenga ku bw’agahinda n’umubabaro yavuganaga. Ni umubyeyi ukuze, ufite imyaka 64 y’amavuko, wivugira ko abazunguzayi ba Nyabugogo bamufata nka nyirakuru muri uyu mwuga, dore ko avuga ko yatangiye gucuruza agataro afite imyaka 29, ubu akaba abimazemo imyaka 35.

Nyirabambogo Martha imbere y’abayobozi agaragaza agahinda n’umubabaro we nka nyirakuru w’abazunguzayi nk’uko abyivugira ari nako abyemeranywaho na bagenzi be

Nyirabambogo avuga ko mu myaka yose yakoze aka kazi ko gucuruza agataro, yagiye ahura n’akaga gakomeye kimwe na bagenzi be, akaba yaragiye afungwa aranakubitwa ariko yanga kureka aka kazi, kuko ari ko kamutunze kandi akaba atakwibonera ubushobozi bwo gucururiza mu isoko nk’abandi.

Nyirabambogo Martha, yavuze ko aka kazi kamufashije kurihira ishuri umwana w’impfubyi wabuze ababyeyi be muri Jenoside yo mu 1994, gusa ubu akaba yararangije ntahite abona akazi, n’ubundi uyu mukecuru akaba ari we wirirwa ashakisha icyabatunga, nta handi ashakiye hatari mu bucuruzi bw’agataro.

Igihe cyaje kugera, kwihangana biranga araturika ararira, abari aho bagwa mu kantu

Nyirabambogo Martha yavuze ko hari bamwe mu bayobozi bagezwaho inkunga zigenewe aba bazunguzayi, bakazijyanira nyamara bazi neza ko Perezida Paul Kagame nabo aba yabatekerejeho. Ubwo yavugaga ibi, kwihangana byamunaniye ararira arahogora, abari bitabiriye inama bagwa mu kantu.

Inama yarangiye abayobozi bijeje abazunguzayi ko nyuma yo kuganira nabo bakumva ibibazo byabo, bagiye kubashakira imishinga n’ibikorwa by’ubucuruzi bazakora ariko nabo basabwa kwiyandikisha mu mirenge ngo bazagire aho babasanga hazwi.

REBA VIDEO HANO ABAZUNGUZAYI BACINYA AKADIHO MBERE Y’INAMA:

KANDA HANO UREBE VIDEOS UTASANGA AHANDI