Nyirakuru w’abazunguzayi yasabye Perezida Kagame imboga zo kurisha umutsima yabahaye

Chief Editor | 3-09-2016
Nyirakuru w’abazunguzayi yasabye Perezida Kagame imboga zo kurisha umutsima yabahaye

Umukecuru umaze imyaka isaga 35 akora akazi k’ubuzunguzayi ndetse ukomeje kwamamara ku kazina ka ’Nyirakuru w’abazunguzayi’, yasabye imbabazi ku bw’ibihumbi byinshi by’abazunguzayi yazanye muri uyu mwuga, anashimira Perezida Kagame kuba yarabahaye isoko ariko asaba ko yazabaha n’imboga zo kurisha umutsima yabahaye.

Nyirabambogo Martha ni umubyeyi ukuze, ufite imyaka 64 y’amavuko, wivugira ko abazunguzayi ba Nyabugogo bamufata nka nyirakuru muri uyu mwuga, dore ko avuga ko yatangiye gucuruza agataro afite imyaka 29, ubu akaba abimazemo imyaka 35.

Izina rya Nyirakuru w’abazunguzayi, niwe waryivugiye tariki 7 Gicurasi 2016, imbere y’abayobozi barimo Minisitiri w’uburinganire n’umuryango, umuyobozi w’akarere ka Nyarugenge, ushinzwe imibereho myiza y’abaturage mu mujyi wa Kigali n’abandi batandukanye ubwo baganiraga n’abazunguzayi ku nzira zakoreshwa ngo bavanwe muri ubu bucuruzi bw’akajagari.

REBA VIDEO HANO ABAZUNGUZAYI BACINYA AKADIHO MBERE Y’INAMA:

Nyirabambogo wavugaga ko mu myaka yose yakoze aka kazi ko gucuruza agataro yagiye ahura n’akaga gakomeye kimwe na bagenzi be, akaba yaragiye afungwa aranakubitwa ariko akanga kukareka kuko ari ko kamutunze kandi akaba atakwibonera ubushobozi bwo gucururiza mu isoko nk’abandi, kuri uyu wa Gatandatu tariki 3 Nzeri 2016 yasabye imbabazi imbere y’abayobozi bari bitabiriye umuhango wo gutaha isoko aba bazunguzayi bubakiwe mu gace ka Nyabugogo, kubera umubare munini w’abantu yazanye muri ubu bucuruzi bw’abazunguzayi, ariko anabatuma kuri Perezida Kagame.

Aha ni muri Gicurasi 2016 ubwo yivugiraga ko ari Nyirakuru w’abazunguzayi

Nyirabambogo Martha, yashimye cyane Perezida Paul Kagame ku kuba aba bazunguzayi barubakiwe isoko bazakoreramo bakava mu bucuruzi bw’akajagari, ariko n’ubundi ntiyaripfana avuga ko bahawe isoko ntibahabwe igishoro, akaba abifata nko guhabwa umutsima utagira imboga, asaba ko abayobozi bari bahari bazamusaba agakomeza kubashyigikira.

Muri Gicurasi nabwo uyu mukecuru yari yatumye aba bayobozi kuri Perezida Kagame, icyo gihe akaba yaravuze ko hari bamwe mu bayobozi bagezwaho inkunga zigenewe aba bazunguzayi, bakazijyanira nyamara bazi neza ko Perezida Paul Kagame nabo aba yabatekerejeho. Ubwo yavugaga ibi, kwihangana byaramunaniye ararira arahogora, abari bitabiriye inama bagwa mu kantu.

Mu mezi ashize uyu mukecuru yasutse amarira imbere y’abayobozi barumirwa

KANDA HANO UREBE VIDEOS UTASANGA AHANDI