Nyuma y’imyaka 6 umugore we ari muri Koma, yaratuje ategereje gusa ubushake bw’Imana

Chief Editor | 20-09-2016
Nyuma y’imyaka 6 umugore we ari muri Koma, yaratuje ategereje gusa ubushake bw’Imana

Umugabo wo mu mujyi wa Kigali ufite umugore umaze imyaka irenga 6 ari mu bitaro bya giririkare i Kanombe aho ari muri ’Koma’, avuga ko nta cyizere cy’uko uwo mugore we azakira gihari kuko n’akanama k’abaganga kamugaragarije ko nta kindi yakorerwa, akumva icyo ategereje ari ikizava gusa mu bushake bw’Imana.

Dusabimana Mediatrice, ni umugore umaze imyaka irenga itandatu ari muri Koma, akaba yarasinzirijwe ubwo yaterwaga ikinya agiye kubyara hanyuma amaze kubyara abaganga bananirwa kumukangura kugeza n’ubu, mu gihe uwo mwana yabyaraga we ubu ari mukuru ndetse yanatangiye ishuri nyina akiryamye mu bitaro.

JPEG - 271.7 kb

Ntavuga, ntiyumva, ntareba, yibereye muri Koma amazemo imyaka irenga 6

Muri Kanama 2010, nibwo Dusabimana Mediatrice yajyanywe ku bitaro bya gisirikare i Kanombe mu mujyi wa Kigali, nyuma yo koherezwa kuri ibi bitaro avuye ku ivuriro rya Gahanga mu karere ka Kicukiro. Tariki 9 Kanama 2010 nibwo yabyariye muri ibi bitaro bya gisirikare i Kanombe abazwe, ariko nyuma yo kumubaga akabyazwa atewe ikinya, abaganga ntibashoboye kumukangura ahubwo kuva icyo gihe kugeza n’uyu munsi aracyasinziriye, uyu musinziro udashira (koma) ukaba warakomeje guhangayikisha umuryango we ariko ubu babuze ikindi bakora baratuza bategereza icyo Imana izakora.

Ntahobavukira Alexis; umugabo wa Dusabimana Mediatrice, yatangarije ikinyamakuru Ukwezi.com ko akanama k’abaganga bakurikiranaga uyu mugore we, gaherutse kwemeza ko nta kindi kintu yakorerwa ndetse no kumujyana kuvurirwa hanze byaba ari uguta igihe.

Ibi ngo byatumye yumva nawe ntacyo yakora kindi, kandi ngo ntiyarambirwa kumurwaza kuko ari we mugore afite, avuga ko azakomeza gukora ibyo ashoboye kuzageza igihe Imana izakora ibijyanye n’ubushake bwayo, gusa ngo ibyo gukira byo ubu ntakinabitekereza.

JPEG - 382.4 kb

Ntahobavukira Alexis n’umwana we, uyu mwana niwe nyina yari abereye ku nda ubwo yaterwaga ikinya ntakanguke

Dusabimana Mediatrice ubu yibera mu bitaro bya gisirikare i Kanombe, aho bamuha ibimutunga bacishije muri sonde yashyizwemo mu mazuru. Umwana wabo wujuje imyaka itandatu mu kwezi gushize, agize iyi myaka atarabasha kugira icyo avugana na nyina, dore ko yamenye ubwenge asanga yituriye mu bitaro.

KANDA HANO UREBE VIDEOS UTASANGA AHANDI