Ruhango: Amayobera ku muturage bivugwa ko yafunganywe umuti uvura SIDA

Chief Editor | 31-05-2016
Ruhango: Amayobera ku muturage bivugwa ko yafunganywe umuti uvura SIDA

Ahagana mu mwaka wa 2005, nibwo umugabo witwa Mahoro Isidore yamamaye mu Rwanda nyuma yo gutangaza ko yahawe umuti wa SIDA na Bikiramariya nyina wa Yezu w’i Nazareti, nyamara kugeza ubu uyu mugabo uri muri gereza ntavugwaho rumwe, kuko bamwe bemeza ko aho afungiye yibitseho umuti wabasha guhashya burundu iki cyorezo cya SIDA naho abandi bakavuga ko yatekaga imitwe.

Mahoro Isidore yari atuye mu kagari ka Nyakarekare, mu murenge wa Mbuye ho mu karere ka Ruhango mu Ntara y’Amajyepfo. Yamamaye cyane mu mwaka wa 2005 ubwo yatangazaga ko yahawe na Bikiramariya umuti uvura agakoko gatera SIDA, kuva ubwo umuhanda Mbuye - Muhanga uba nyabagendwa, aboroheje n’abakomeye bagana uyu muvuzi ari benshi maze nawe umuti awubahata atizigama.

Mahoro yabaye umukire karahava, aha benshi imirimo, abajyaga kwahira imiti, abayitunganyaga bagendeye ku mabwiriza yabahaga n’abandi mu ngeri zitandukanye bamugiriraho amahirwe, gusa Minisiteri y’Ubuzima iza kumuhagarika imubuza gukomeza gutanga iyo miti ngo izabanze ikorweho ubushakashatsi byemezwe koko niba yabasha gukiza SIDA ndetse ikaba nta n’ikindi kibazo yatera uwayinyweye.

Bidateye kabiri, Mahoro Isidore yaje kuregwa ibyaha bya Jenoside yakorewe abatutsi, araburana biramuhama maze akatirwa imyaka 30 y’igifungo, ibijyanye n’ubuvuzi bwe ndetse n’ubushakashatsi byavugwaga ko buzakorwa ku miti atanga, nabyo amaherezo yabyo yahise aba ayo kujyana n’ibanga rye muri gereza.

Abatuye mu murenge wa Mbuye baganiriye n’ikinyamakuru Ukwezi.com, ntibavuga rumwe ku buvuzi bw’uyu mugabo, kuko bamwe bemeza ko yavuraga SIDA ndetse bakanatanga ingero z’abo bazi bagiye bamugabira inka bamushimira ko yabavuye, mu gihe hari abandi bavuga ko imiti yatangaga yashoboraga gutuma agakoko gatera SIDA katagaragara mu mubiri mu gihe gito nyuma kakazongera kakigaragaza.

Hari kandi n’abashimangira ko nta buvuzi na mba Mahoro Isidore yatangaga, bakabona kuri bo abatangaga ubuhamya ari ababaga bashaka kwirema agatima ko bakize nyamara bazi ku mutima ko bishuka. Iyo ubajije abaturage bo muri uyu murenge ibijyanye n’ubuvuzi bwa SIDA uyu Mahoro yatangaga, icyo bose bahurizaho ni uko abamugannye ari ibihumbi byinshi ariko ibijyanye n’ireme ry’ubwo buvuzi bwe byo buri wese usanga abivuga ukwe.

KANDA HANO UREBE VIDEOS UTASANGA AHANDI