Ruhango: Ubukwe bwapfuye ku munota wa nyuma habura amasaha ngo basezerane

Chief Editor | 27-08-2016
Ruhango: Ubukwe bwapfuye ku munota wa nyuma habura amasaha ngo basezerane

Kuri iki Cyumweru tariki 28 Kanama 2016, nibwo umusore wo mu murenge wa Byimana n’umukobwa wo mu murenge wa Mbuye yombi yo mu karere ka Ruhango, bagombaga gukora ubukwe ariko bwapfuye ku munota wa nyuma ku mpamvu kugeza ubu z’amayobera.

Umusore witwa Ernest wo mu murenge wa Byimana, amaze igihe gito akorera mu murenge wa Mbuye aho yageze agakundana n’umukobwa witwa Esther ndetse agahita anamutera inda, nyuma bagahita bapanga ubukwe.

Kuri iki Cyumweru nibwo hagombaga kuba imihango yo gusaba no gukwa mu murenge wa Mbuye igakurikirwa no gusezerana imbere y’amategeko mu murenge wa Nyarubaka mu karere ka Kamonyi, nyuma bagahita babana kuko gusezerana imbere y’Imana batari kubyemererwa n’Itorero ry’Abadivantisiti b’umunsi wa karindwi bitewe n’uko umukobwa atwite.

Ku gicamunsi cyo kuri uyu wa Gatandatu, Ernest yahamagaye umuryango w’umukobwa bagombaga gukora ubukwe, abamenyesha ko yarwaye bityo anabwira nyina w’umukobwa (uwari ugiye kumubera nyirabukwe) ko ubukwe butakibaye kubera ikibazo cy’uburwayi.

Abaturanye n’umuryango w’umukobwa babwiye ikinyamakuru Ukwezi.com ko uyu musore avuga ko hari ibintu bamuroze, bakaba bakeka ko ari uburyo bwo kumubenga kuko nta n’igihe kinini bari bamaze bakundana, uretse kuba yaramuteye inda umukobwa akamusaba ko bahita babana.

Ikinyamakuru Ukwezi.com cyavuganye na Ernest ku murongo wa telefone, adutangariza ko hari ibintu bimaze nk’ukwezi bimufata abantu bamuroze, byamara kumufata akamenagura ibintu akanarwana ndetse akanakubita umutwe we ku bintu biri hafi, akazanzamuka yanegekaye.

Ubwo twavuganaga mu masaha y’umugoroba, yavugaga ko ari i Rwamagana ari kumwe na nyina ahantu bagiye kumuvuza mu bavuzi gakondo bavura iby’imyuka mibi n’amarozi, kandi akemeza ko n’umukobwa abizi kuko ngo byajyaga bimufata bari kumwe akamukubita, yazanzamuka umukobwa akabimubwira undi akumirwa akamusaba imbabazi.

Avuga ko akunda uwo mukobwa cyane kandi akaba atamuhemukira, ariko akaba yabuze ukundi yabigira kuko aho arimo kwivuza banze ko ataha atarakira neza, kandi ngo ubwo bari mu nzira berekezayo yagiye akubitagura umutwe ku modoka kuburyo yazahaye, akaba yumva ubukwe butaba.

Avuga ko ubu icyo yifuza ari nk’icyahita kimwica akavaho kuko afite agahinda mu mutima we, kuko ibi bintu avuga ko bamuroze bimaze kumubuza amahoro, mu minsi ishize akaba yarafashwe bigatuma amenagura ibirahure by’inzu yubatse akabimara, aho azanzamukiye nawe akumirwa akajya kugura ibindi abantu bakamuha inkwenene.

Update: Amakuru mashya yageze ku kinyamakuru Ukwezi.com mu gitondo cyo kuri iki Cyumweru, ni uko umusore yageze i Mbuye kwa sebukwe w’umukobwa ari naho ari kugeza ubu ariko akaba yahageze ameze nk’ufite uburwayi bwo mu mutwe, dore ko yagiye yambaye ibirenge ndetse anafite ubugari buhiye mu mufuka.

Icyaje gutera urujijo kurushaho ariko, hari abagiye ku biro by’umurenge wagombaga kuberaho imihango yo gusezerana imbere y’amategeko, basanga aba bageni batarigeze biyandikisha mu gihe umusore yari yarasabye nyirabukwe amafaranga akajya kwandikisha urukiko ndetse akanamubwira ko atari ngombwa kujyana n’umukobwa, bikaba bishingirwaho abantu bemeza ko uyu musore yaba ateka imitwe.

Ikindi gishingirwaho bavuga ko ateka imitwe, ni uko agace yavugaga ko yubatsemo amazu nako basanze abeshya nta n’ikibanza ahagira.

KANDA HANO UREBE VIDEOS UTASANGA AHANDI