Ruhango: Umusore yafunzwe nyuma yo guteka imitwe ku mugeni bari bagiye kubana

Chief Editor | 28-08-2016
Ruhango: Umusore yafunzwe nyuma yo guteka imitwe ku mugeni bari bagiye kubana

Kuri iki Cyumweru tariki 28 Kanama 2016, hari hateganyijwe ubukwe bw’umusore wo mu murenge wa Byimana n’umukobwa wo mu murenge wa Mbuye yombi yo mu karere ka Ruhango, ariko ubu bukwe bukaba butabaye ahubwo umusore byarangiye atawe muri yombi nyuma yo guteka imitwe ku muryango w’umugeni.

Umusore witwa Ernest wo mu murenge wa Byimana, yari amaze igihe gito akorera mu murenge wa Mbuye aho yageze agakundana n’umukobwa witwa Esther ndetse agahita anamutera inda, nyuma bagahita bapanga ubukwe.

Byari biteganyijwe ko kuri iki Cyumweru hagombaga kuba imihango yo gusaba no gukwa mu murenge wa Mbuye igakurikirwa no gusezerana imbere y’amategeko mu murenge wa Nyarubaka mu karere ka Kamonyi, nyuma bagahita babana kuko gusezerana imbere y’Imana batari kubyemererwa n’Itorero ry’Abadivantisiti b’umunsi wa karindwi bitewe n’uko umukobwa atwite. Nyamara ibyo gusezerana mu mategeko, umusore byaje gutahurwa ko yabigizemo amanyanga agateka umutwe mu muryango w’umukobwa.

Kidobya muri ubu bukwe yatangiye kugaragara ku gicamunsi cyo kuri uyu wa Gatandatu, ubwo Ernest yahamagaraga umuryango w’umukobwa bagombaga gukora ubukwe, abamenyesha ko yarwaye bityo anabwira nyina w’umukobwa (uwari ugiye kumubera nyirabukwe) ko ubukwe butakibaye kubera ikibazo cy’uburwayi.

Kuri uyu wa Gatandatu mu masaha y’umugoroba, Ikinyamakuru Ukwezi.com cyavuganye na Ernest ku murongo wa telefone, adutangariza ko hari ibintu bimaze nk’ukwezi bimufata abantu bamuroze, byamara kumufata akamenagura ibintu akanarwana ndetse akanakubita umutwe we ku bintu biri hafi, akazanzamuka yanegekaye.

Ubwo twavuganaga, yavugaga ko ari i Rwamagana ari kumwe na nyina ahantu bagiye kumuvuza mu bavuzi gakondo bavura iby’imyuka mibi n’amarozi. Yavugaga ko akunda uwo mukobwa cyane kandi akaba atamuhemukira, ariko akaba yabuze ukundi yabigira kuko aho arimo kwivuza banze ko ataha atarakira neza, kandi ngo ubwo bari mu nzira berekezayo yagiye akubitagura umutwe ku modoka kuburyo yazahaye, akaba yumva ubukwe butaba.

Yivugiraga kandi ko icyo yifuza ari nk’icyahita kimwica akavaho kuko afite agahinda mu mutima we, kuko ibi bintu avuga ko bamuroze bimaze kumubuza amahoro, mu minsi ishize akaba yarafashwe bigatuma amenagura ibirahure by’inzu yubatse akabimara, aho azanzamukiye nawe akumirwa akajya kugura ibindi abantu bakamuha inkwenene.

Ibintu ariko byaje guhindura isura mu masaha ya mugitondo cyo kuri iki Cyumweru, ubwo umusore yageraga i Mbuye kwa nyirabukwe asaba ko bamuha umugeni we, ariko yari ameze nk’ufite uburwayi bwo mu mutwe, dore ko yagiye yambaye ibirenge ndetse anafite ubugari buhiye mu mufuka. Abantu batekerezaga ko yaba arimo guteka umutwe bahise batangira gutekereza ko koko yaba afite ikibazo cy’uburwayi.

Icyaje gutera urujijo ariko, hari abagiye ku biro by’umurenge wagombaga kuberaho imihango yo gusezerana imbere y’amategeko, basanga aba bageni batarigeze biyandikisha mu gihe umusore yari yarasabye nyirabukwe amafaranga akajya kwandikisha urukiko ndetse akanamubwira ko atari ngombwa kujyana n’umukobwa, kuva ubwo batangira kumva ko uyu musore yaba ari umutekamutwe, n’ibyo by’uburwayi akaba ari ibyo yikoze ngo ashake uko aburizamo ubukwe.

Ubu burwayi yavugaga ko afite, yanashimangiraga ko bwatumye ajya kumenagura ibirahure by’inzu aherutse kuzuza nyuma yazanzamuka akajya kugura ibindi, ariko aho yavugaga ko yubatse kugeza ubu abaturage bavuga ko nabyo byari ukubeshya, kandi akaba yaranagiye abeshya umukobwa imitungo myinshi atari afite.

Ubwo abari babukereye bategereje ubukwe baje kugwa mu kantu, banatangazwa n’uko nta bantu bo mu muryango w’umusore bigeze bahagera baje no kureba uko bimeze, ibintu birushaho kuba urujijo. Mu masaha y’umugoroba wo kuri iki Cyumweru, ubuyobozi bwabonye ko ibintu bikomeje kuba amayobera maze uyu musore atabwa muri yombi.

Byiringiro Jean Paul, Umunyamabanga Nshingwabikorwa w’umurenge wa Mbuye, yabwiye ikinyamakuru Ukwezi.com ko uyu musore yabaye afunzwe ngo hatagira abamugirira nabi kuko n’aha mu murenge wa Mbuye atari iwabo, bakaba bagiye kuvugana n’ubuyobozi bw’umurenge wa Byimana iwabo w’uwo musore kugirango nibinaba ngombwa azashyikirizwa Sitasiyo ya Polisi yaho kugirango akurikiranwe kuri ibyo byaha by’ubutekamutwe bwatumye umuryango w’umukobwa uhomba ibintu byinshi wari wakoresheje witegura ubukwe.

KANDA HANO UREBE VIDEOS UTASANGA AHANDI