Gakenke: Umugore yabwiwe ko umwana we yapfuye bagiye gushyingura basangamo amabuye

Chief Editor | 24-08-2016
Gakenke: Umugore yabwiwe ko umwana we yapfuye bagiye gushyingura basangamo amabuye

Umugore wo mu karere ka Rulindo mu Ntara y’Amajyaruguru witwa Nzamwitakuze Brigitte, yabyariye ku bitaro bya Ruli biherereye mu murenge wa Ruli mu karere ka Gakenke, nyuma abaganga bamubwira ko umwana yapfuye ariko nyuma bagiye kumushyingura basangamo ibipupe n’amabuye, kugeza ubu bikaba byabaye amayobera.

Kuwa Mbere tariki 22 Kanama 2016, nibwo uwo mugore yabyaye, hanyuma kuri uyu wa Kabiri ubwo yari amaze kuzanzamuka, abwirwa ko umwana we yapfuye ndetse nyuma gato hahita hategurwa imihango yo gushyingura uruhinja rwari rwamaze gushyirwa mu isanduku yo gushyinguramo, maze umuntu umwe aza gupfundura isanduku mbere yo gushyingura, asangamo igipupe n’amabuye.

JPEG - 37 kb

Ibi nibyo basanze mu isanduku bibeshyaga ko irimo uruhinja rwapfuye

Umwe mu bakozi b’ibitaro bya Ruli ukora akazi k’ubunyamabanga muri ibi bitaro, yatangarije ikinyamakuru Ukwezi.com ko kuri uyu wa Kabiri ari bwo uwo mugore bamusezereye bakanamuha isanduku irimo uruhinja rwe yabwirwaga ko rwapfuye, uwayitwaye akaba atarigeze apfundura ngo arebe ahubwo akaba yarabibonye bageze ku mva bari bagiye gushyinguramo, bagakubitwa n’inkuba bagahita bajya kuri Polisi.

Amakuru agera ku Kinyamakuru Ukwezi.com kugeza ubu yemezwa na Dr Kaneza Deogratias uyobora ibi bitaro, ni uko umubyaza w’ibi bitaro witwa Bucyensenge Beatha yamaze gutabwa muri yombi nyuma yo kuvumbura ko ari we wari wibye urwo ruhinja ndetse akaba anabyiyemerera, akaba yari yamaze no gusohokana urwo ruhinja hanze y’ibitaro. Uyu mubyaza akaba afunganywe na Dr Sangwa Victor wabimufashijemo kuko ari we wabwiye umubyeyi ko umwana we yapfuye, naho uwitwa Amos Bugingo we yari yaraye izamu. Umwana kugeza ubu yasubijwe ababyeyi be. Uyu Bucyensenge Beatha yari amaze igihe abana n’umugabo ariko ntibarabona urubyaro.

KANDA HANO UREBE VIDEOS UTASANGA AHANDI