RwandAir yamaganye ibyo gutwara abagenzi bafite telefone za Samsung Galaxy Note 7

Chief Editor | 20-09-2016
RwandAir yamaganye ibyo gutwara abagenzi bafite telefone za Samsung Galaxy Note 7

Nyuma y’uko uruganda rwa Samsung rugaragagaje ko telefone zarwo zigezweho za Samsung Galaxy Note 7 zifite ibibazo bikomeye bishobora guteza ibyago abazifite kimwe n’abashobora kuba bari hafi yazo, ubu sosiyete itwara abantu mu ndege yo mu Rwanda izwi nka RwandAir, yahagaritse ibyo gutwara imizigo irimo izi telefone ndetse n’abagenzi bazikoresha bakaba ari abo kwitonderwa.

Mu itangazo RwandAir yashyize ahagaragara kuri uyu wa Kabiri tariki 20 Nzeri 2016, ivuga ko nta mitwaro irimo telefone za Samsung Galaxy Note 7 izongera gutwara mu ndege zayo, kandi abagenzi bagenda mu ndege za RwandAir bakaba bagirwa inama yo kudakoresha telefone mu gihe indege igenda kandi bakaba batagomba kugira iyo babika mu mizigo yabo nyuma y’uko ikorerwa isuzuma (Checking).

By’umwihariko mu ndege nshya RwandAir iherutse kugura za A330 zifite ihuzanzira (Internet) ikoresha icyogajuru, abagenzi bafite telefone za Samsung Galaxy Note 7 ntibemerewe kuzicana cyangwa kuzongeramo umuriro bari mu ndege, kandi ntibemerewe kuzibika mu mizigo yabo yamaze gukorerwa isuzuma.

JPEG - 44.5 kb

Izi telefone za Samsung Galaxy Note 7 zishobora guteza ibibazo bikomeye

Batiri z’izi telefone byagaragaye ko zishobora guteza ibibazo bikomeye. Izirenga 70 muri Leta Zunze Ubumwe za Amerika honyine zarashwanyutse nyuma yo gushyuha cyane, muri Canada n’ahandi ku isi naho ibi bikaba byarabaye kugeza ubwo uruganda rwiyemeza guhagarika kuzicuruza.

Ubukana bw’ibyo izi telefone zishobora kwangiza, bwanatumye muri Leta ya Florida muri Leta Zunze Ubumwe za Amerika, iyi telefone ya Samsung Galaxy Note 7 itwika imodoka yo mu bwoko bwa Jeep Grand Cherokee ndetse no mu majyepfo ya Carolina hari igaraje bikekwa ko ryatwitswe n’iyi telefone.

KANDA HANO UREBE VIDEOS UTASANGA AHANDI