SIDA no gutwara inda ku bakobwa b’Abarundikazi biravuza ubuhuha mu nkambi ya Mahama

Chief Editor | 1-08-2016
SIDA no gutwara inda ku bakobwa b’Abarundikazi biravuza ubuhuha mu nkambi ya Mahama

Imibare y’abana b’abakobwa batwara inda zitifuzwa mu nkambi ya Mahama icumbikiye impunzi z’Abarundi, igenda irushaho kuzamuka ari nako imibare y’abandura agakoko gatera SIDA nayo igenda izamuka cyane.

Abasore n’inkumi baganiriye na Radio Ijwi ry’Amerika dukesha iyi nkuru, bavuga ko abana b’abakobwa bemera gusambana akenshi n’abasore cyangwa abagabo bari hanze y’inkambi, kugirango babahe amafaranga abagoboka mu bibazo by’ubukene barimo. Hari n’abavuga ariko, ko umwana w’umukobwa ajya yemera kuryamana n’abashumba kugirango bamuhe inkwi, dore ko abari muri iyinnkambi bazibona bibagoye cyane.

Bivugira kandi ko uretse n’abakobwa, hari n’abasore b’impunzi bakundana n’abakobwa bo mu bice byegereye inkambi, bagakundana bakajya baryamana, hanyuma abo bakobwa bakabaha amafaranga. Muri aba bose ariko, ntabwo ikoreshwa ry’agakingirizo ryitabwaho cyane ari nayo mpamvu hari benshi mu bana b’abakobwa bakomeje gutwara inda.

Kugeza ubu muri iyi nkambi, abasaga 50 bashobora kuvuka buri cyumweru nk’uko byemezwa n’abayobozi muri iyi nkambi, kandi umubare munini w’abari mu nkambi ni urubyiruko, kuburyo ababyara usanga harimo n’umubare munini w’abana b’abakobwa bakiri bato.

Hari umwe muri izi mpunzi wavuze ko ubu imibare y’abanduye agakoko gatera SIDA mu nkambi irenga abantu 1000, nyamara bakigeramo bakaba barabarirwaga muri 200, bisobanura ubwiyongere bukabije bw’iki cyorezo ku barundi bari mu nkambi ya Mahama.

Ababyeyi bagira inama urubyiruko kwirinda kwiyahura bishora mu busambanyi bushobora kubangiriza ejo habo hazaza, uwo binaniye agakoresha agakingirizo. Bavuga ko bakwiye kwihangana, igihe cyo gutahuka mu gihugu cyabo cyazagera bakazataha badafite ipfunwe.

KANDA HANO UREBE VIDEOS UTASANGA AHANDI