Senateri Jean de Dieu Mucyo yikubise hasi ahita yitaba Imana

Chief Editor | 3-10-2016
Senateri Jean de Dieu Mucyo yikubise hasi ahita yitaba Imana

Senateri Jean de Dieu Mucyo, yitabye Imana mu masaha ya mugitondo cyo kuri uyu wa Mbere tariki 3 Ukwakira 2016, nyuma yo kugwa mu biro by’Inteko Ishinga Amategeko y’u Rwanda; umutwe wa Sena, akajyanwa kwa muganga igitaraganya ari naho yashiriyemo umwuka.

Dr Jean Damascene Bizimana, Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG) wasimbuye Senateri Jean De Dieu Mucyo kuri uyu mwanya akaba by’umwihariko yari n’inshuti ya nyakwigendera, yabwiye ikinyamakuru Ukwezi.com ko Jean De Dieu Mucyo yaguye kuri esikariye (Escariers) zo mu nyubako y’Inteko Ishinga amategeko y’u Rwanda, agahita ajyanwa ku bitaro byitiriwe umwami Faycal ari naho yaguye.

Mucyo Jean de Dieu utabarutse afite imyaka 55, yakoze imirimo inyuranye yatumye amenyekana muri politiki y’u Rwanda. Nyuma ya Jenoside yakorewe Abatutsi yabaye Minisitiri w’Ubutabera, yabaye Umushinjacyaha Mukuru w’u Rwanda, yanabaye Umunyamabanga Nshingwabikorwa wa Komisiyo y’Igihugu ishinzwe kurwanya Jenoside.

Uretse iyo mirimo, yanamenyekanye no ku rwego mpuzamahanga kubera komisiyo yayoboye ikanamwitirirwa yari ishinzwe gucukumbura uruhare rw’u Bufaransa muri Jenoside yakorewe Abatutsi. Iyi raporo yashinje u Bufaransa ko bwagize uruhare mu muri Jenoside yakorewe Abatutsi. Yari umusenateri guhera muri Gicurasi umwaka ushize.

KANDA HANO UREBE VIDEOS UTASANGA AHANDI