Umuherwe wa mbere ku isi agiye gufasha abakene bo mu gice kirimo n’u Rwanda

Chief Editor | 9-06-2016
Umuherwe wa mbere ku isi agiye gufasha abakene bo mu gice kirimo n’u Rwanda

Bill Gates, umuherwe wa mbere ku isi, agiye gufasha abaturage bari mu bukene bo mu bihugu biri munsi y’ubutayu bwa Sahara birimo n’u Rwanda, kandi avuga ko abona neza ko agiye guhindura imibereho yabo, kuburyo mu mwaka umwe gusa abazakoresha neza inkunga agiye kubaha bazaba barenze umurongo w’ubukene.

Nk’uko Bill Gates yabitangaje ku rubuga rwe no ku mbuga nkoranyambaga, agiye gutanga inkoko ku baturage bagera kuri 30% by’abari mu bukene bukabije, aya matungo n’ubwo ari magufi akaba asanga ari yo yahindura ubuzima bw’abibasiwe n’ubukene mu bihugu byo munsi y’ubutayu bwa Sahara birimo n’u Rwanda.

Bill Gates avuga ko yagenze cyane mu bihugu birimo abaturage bari mu bukene bukabije, akitegereza neza uburyo abakorera ubworozi bw’inkoko muri ibyo bihugu bibagirira akamaro, agasanga hari impamvu enye z’ingenzi akwiye koroza inkoko aba baturage.

Impamvu ya mbere atanga, ni uko inkoko zitagora kuzorora ugereranyije n’andi matungo, haba mu byo zirya no mu buvuzi bwazo, bityo agasanga ari bwo bworozi abari mu bukene bukabije bakwiye kwitabira nawe akabibafashamo.

Impamvu ya kabiri Bill Gates atanga, ni iy’uko inkoko zororoka kandi zigatanga umusaruro byihuse. Atanga urugero ku mworozi ufite inkoko 5, akerekana ko nyuma y’amezi atatu uwo mworozi ashobora kuba amaze kugira inkoko 40, hanyuma buri nkoko yagurishwa ku madolari 5, bikaba byamuhesha kwinjiza amadolari 1000 mu mwaka, mu gihe urugero fatizo rw’abari munsi y’umurongo w’ubukene ari urw’abatabasha kwinjiza amadolari 700 mu mwaka.

Impamvu ya gatatu atanga, ni iy’uko inkoko zishobora gufasha abana kugira ubuzima bwiza. Avuga ko n’ubwo amagi ari meza mu mirire y’abana, ibyiza ku borozi bagifite inkoko nkeya, ari ukureka zikororoka hakagurishwa inkoko ziba zavutse, hakaboneka amafaranga yagura ibyo kurya bihagije. Avuga ariko ko abamaze kuzigwiza bashobora kujya baha n’abana amagi, cyangwa bagatoranya aba yamenetseho gato bakaba ari yo babagaburira.

Impamvu ya kane ari nayo ya nyuma, ni uko ubworozi bw’inkoko yasanze bufasha abagore kuzamuka no kwiteza imbere. Avuga ko mu bihugu bya Afurika, yasanze inkoko zifatwa nk’amatungo aciriritse agenewe abagore, kuburyo umugore uzifite mu rugo zimufasha kwizamura no kwiteza imbere, mu gihe umugabo aba ashishikajwe n’ubworozi bw’andi matungo maremare nk’inka n’ihene.

KANDA HANO UREBE VIDEOS UTASANGA AHANDI