Umunyamakuru Jean Lambert Gatare yapfushije umugore

Chief Editor | 3-10-2016
Umunyamakuru Jean Lambert Gatare yapfushije umugore

Umunyamakuru Jean Lambert Gatare wakoreye ibitangazamakuru bitandukanye mu Rwanda, yapfushije umugore kuri uyu wa Mbere tariki 3 Ukwakira 2016, nyuma y’igihe kirekire arembye cyane.

Jean Lambert Gatare, yari amaze igihe gikabakaba imyaka ibiri arwaje uyu mufasha we, akaba yaramuvuje i Nairobi, mu bitaro byitiriwe umwami Faycal ku Kacyiru mu mujyi wa Kigali n’ahandi henshi ariko byarangiye ashizemo umwuka kuri uyu wa Mbere.

Kuwa Gatandatu tariki 1 Ukwakira 2016, nibwo inshuti z’uyu muryango n’abanyamakuru bakorana nawe, batangaje ko uyu mugore yashizemo umwuka ariko ubuyobozi bw’ibitaro bwemeza ko atarashiramo umwuka n’ubwo yari amerewe nabi cyane.

Inkuru ibabaje y’urupfu rw’umugore wa Jean Lambert Gatare, rwemejwe na Diana Kaneza ushinzwe itangazamakuru mu bitaro byitiriwe umwami Faycal aho yari amaze igihe arwariye, akaba yazize indwara y’impyiko yari amaranye imyaka ikabakaba ibiri.

Umunyamakuru Jean Lambert Gatare yakoreye igihe kirekire cyane Radio y’u Rwanda, nyuma aza kujya kuri Radio Isango Star aho amaze imyaka myinshi ari umuyobozi wayo. Amaze igihe akora akazi k’itangazamakuru, ariko akagafatanya n’inshingano zitoroshye zo kwita ku buzima bw’umufasha we.

Mu izina ry’abakunzi, abasomyi n’ubuyobozi bw’ikinyamakuru Ukwezi.com, twifurije nyakwigendera kuruhukira mu mahoro, tunaboneraho kwihanganisha Jean Lambert Gatare n’umuryango we wose.

Update: Imihango yo gushyingura iteganyijwe kuri uyu wa Gatatu tariki 5 Ukwakira 2016, gusezera kuri nyakwigendera bikazabera kwa Jean Lambert Gatate mu Nyakabanda saa tatu za mugitondo, saa sita hakazaba misa yo kumusabira kuri Regina Pacis i Remera, naho gushyingura ni saa cyenda z’umugoroba i Rusororo.

KANDA HANO UREBE VIDEOS UTASANGA AHANDI