Umunyarwandakazi wahembwe n’umwamikazi w’u Bwongereza arimo gukabya inzozi

Chief Editor | 22-06-2016
Umunyarwandakazi wahembwe n’umwamikazi w’u Bwongereza arimo gukabya inzozi

Nancy Sibo; umukobwa w’umunyarwandakazi ukiri muto, akomeje kungukira byinshi mu gihugu cy’u Bwongereza aho amaze iminsi mu ruzinduko yagiyemo nyuma yo gutoranywa mu bakiri bato 60 ku isi yose bagaragaye nk’indashyikirwa bakemererwa ibihembo n’umwamikazi w’u Bwongereza.

Nancy Sibo w’imyaka 22 y’amavuko, ni umwe mu bakobwa bagaragaje guhanga udushya mu Rwanda akanamenyekana mu ruhando mpuzamahanga, kuburyo byatumye atoranywa mu bakiri bato 60 ku iyi yose bagize uruhare mu guhindura imiryango y’aho batuye, bakaza kwemererwa ibihembo n’Umwamikazi w’U Bwongereza; Queen Elisabeth.

Uru rubyiruko ruba rwagaragaje ibikorwa by’indashyikirwa, ruhita rujya mu cyitwa "Queen Young Leaders". Ubu uyu munyarwandakazi kimwe n’abandi bakiri bato baturutse hirya no hino ku isi, bamaze igihe bakorera ingendo shuri mu bice bitandukanye by’u Bwongereza, aho banahuguwe ku buryo barushaho gukomeza kubera isi urumuri.

Aha uru rubyiruko rwari rwasuye icyicaro gikuru cya Twitter kiri mu Bwongereza.

Basuye Kaminuza zitandukanye n’ibindi bigo bikora ibintu binyuranye, banasura igitangazamakuru mpuzamahanga cy’abongereza kizwi nka BBC aho batatu muri bo barimo n’uyu munyarwandakazi batanze ibiganiro babazwa byinshi ku mishinga yabo yatumye bahembwa n’umwamikazi w’u Bwongereza, Queen Elisabeth. Ibi bikorwa kandi birakomeje, bikaba biteganyijwe ko Nancy Sibo azagaruka mu Rwanda mu cyumweru gitaha.

Nancy Sibo (wambaye umutuku) na bagenzi be batatu bari mu kiganiro na BBC

Mu mwaka wa 2014, Nancy Sibo yabashije gukora uburyo bw’ikoranabuhanga (application) yise “Mobile Cow”, bufasha aborozi kumenya gucunga no kugenzura neza ibijyanye n’ubuzima bw’imyororokere y’inka zabo. Umushinga we wanabashije kwegukana igihembo cyiswe Miss Geek Rwanda nyuma yo gutsinda abo bahatanaga bagera kuri 25.

Uretse uyu mushinga we, Nancy Sibo ni na rwiyemezamirimo washinze ikigo yise ‘Miheha Bag Initiative’, gitunganya imiheha ya purasitiki igakorwamo ibikoresho by’imirimbo nk’imikandara, udukapu abagore bitwaza mu ntoki ndetse n’amaherena.

KANDA HANO UREBE VIDEOS UTASANGA AHANDI