Umunyemari Mugambira ushinjwa gushora abakozi be mu busambanyi yatewe utwatsi

Chief Editor | 12-08-2016
Umunyemari Mugambira ushinjwa gushora abakozi be mu busambanyi yatewe utwatsi

Mugambira Aphrodis, umunyemari ufite hoteli mu karere ka Karongi yitwa Golf Eden Rock, yatewe utwatsi ku cyifuzo cye cyo kuba arekuwe mu igihe iperereza rikomeje, Urukiko rwemeza ko aba afunzwe by’agateganyo iminsi 30, hagakomeza gukurikiranwa iby’ibyaha aregwa byo gushishikariza abantu gukora uburaya. Uyu munyemari kandi yanagerageje gusaba ko yatanga ingwate ariko nabyo urukiko rurabyanga.

Uyu munyemari yatawe muri yombi kuwa Gatatu tariki 3 Kanama 2016, akurikiranyweho icyaha cyo gushishikariza, koshya no kuyobya abantu abajyana mu buraya, bikavugwa ko aba yabikoreye ari abakozi be.

Mu kwezi kwa Kamena uyu mwaka, nibwo byavuzwe cyane ko abakobwa bakora muri Hotel Golf Eden Rock ya Mugambira Aphrodis, bamushinja kubategeka gusambana n’abagabo b’abakiliya b’iyi hoteli, ababyanze bakirukanwa kandi ntibahabwe integuza n’imperekeza.

Kuri uyu wa Kane tariki 11 Kanama 2016 Mugambira n’ubushinjacyaha baburanaga ku bijyanye no kuba yafungwa iminsi 30 y’agateganyo cyangwa niba yafungurwa akaburana ari hanze, umwanzuro urukiko rw’ibanze rwa Bwishyura rukaba rwawusomye kuri uyu wa Gatanu.

Urukiko rwanzuye ko mu gihe Mugambira yaramuka arekuwe, byakwica iperereza bityo akaba agomba gufungwa iminsi 30 mu gihe hagikusanywa ibimenyetso ku byaha aregwa. Mugambira n’abamwunganira kandi basabye ko hatangwa umwishingizi hamwe na miliyoni imwe y’amafaranga y’u Rwanda nk’ingwate ngo afungurwe, ariko urukiko rubitera utwatsi kuko rusanga byabangamira ibindi bikorwa by’iperereza no gukusanya ibimenyetso.

KANDA HANO UREBE VIDEOS UTASANGA AHANDI