Umushahara muto utuma abaganga b’inzobere bacika Leta bakajya mu bitaro byigenga

Chief Editor | 21-05-2016
Umushahara muto utuma abaganga b’inzobere bacika Leta bakajya mu bitaro byigenga

Minisitiri w’ubuzima mu Rwanda, Dr Agnes Binagwaho avuga ko abaganga benshi bareka akazi ka Leta bakajya gukora ahandi mu mavuriro n’ibitaro byigenga kubera ikibazo cy’imishahara bahabwa na Leta iba iri hasi cyane.

Minisiteri y’ubuzima yabwiye abanyamakuru ko yatangiye gutekereza uburyo bwo gushishikariza abaganga kuguma mu bitaro bya Leta mu gihe bamwe batangiye kubivamo bigira mu byigenga. Hari na bamwe bahitamo kujya mu yindi myuga itandukanye n’ubuvuzi bagiye kubera gushaka aho babona inyungu zisumbuye.

Minisiteri y’ubuzima kandi ivuga ko idafite ubushobozi bwo kubuza abaganga kujya aho bifuza mu gihe bubahirije amasezerano bagiranye na Leta ubwo yabishyuriraga amashuri. Iyi Minisiteri ivuga ko umuganga wishyuriwe na Leta ategekwa kuguma mu mavuriro ya Leta akarangiza nibura imyaka 3 iyo ari umuganga usanzwe, naho muganga w’inzobere warihiwe amashuri na Leta we akaba asabwa kumara nibura imyaka 4 atahavuye .

Minisiteri y’abakozi ba Leta n’umurimo yo ivuga ko umuganga wabyigiye ugitangira ahabwa amafaranga y’u Rwanda ibihumbi 300 ku kwezi, hanyuma ubona menshi akaba ashobora kugeza mu bihumbi 900 ku kwezi. Uyu mushahara ariko ngo ni mutoya cyane ugereranyije n’utangwa mu mavuriro yigenga aho umuganga ashobora gukuba inshuro zigera kuri 3 umushahara ahabwa iyo akorera Leta .

Cyakora iyi Ministeri ivuga ko imaze gushyikiriza Guverinoma umushinga wo kongerera aba baganga umushahara kugirango bemere kuguma mu bitaro bya Leta. Ikindi ngo harateganywa no kubagabanyiriza amasaha y’akazi kugirango babe bakorera Leta ndetse banemererwe kuba bakorera amavuriro yigenga icyarimwe.

KANDA HANO UREBE VIDEOS UTASANGA AHANDI