Umusore w’Umunyarwanda yapfiriye muri Canada nyuma y’amezi macye ari mu byishimo

Chief Editor | 22-08-2016
Umusore w’Umunyarwanda yapfiriye muri Canada nyuma y’amezi macye ari mu byishimo

Umusore w’umunyarwanda witwa Jean-Baptiste Ajua wari umaze igihe gito yishimira ubwenegihugu bwa Canada, kuwa Gatandatu w’iki cyumweru gishize tariki 20 Kanama 2016 yapfuye arohamye ubwo yari arimo koga ahitwa Birds Hill Beach. Yari umusore ukiri muto kuko yari afite imyaka 22 gusa y’amavuko.

Egide Ndayirukiye, umwe mu nshuti za hafi za nyakwigendera Jean-Baptiste Ajua, yabwiye CBC News dukesha iyi nkuru ko yamenye iby’urupfu rw’iyi nshuti ye mu masaha yo ku Cyumweru mu gitondo, ariko akaba yari yabanje kwanga kubyemera.

Egide Ndayirukiye avuga ko yatunguwe n’uburyo Jean Baptiste Ajua yaba yararohamyemo, ndetse akaba atanazi mu by’ukuri uko byagenze. Avuga ko yari umunyeshuri muri Kaminuza ya Winnipeg aho yigaga ashaka kuzaba umwarimu w’imyitozo ngororamubiri, kandi akaba yari azi koga n’ubwo atari cyane.

Jean Baptiste Ajua yari amaze igihe yishimira kuba umwenegihugu wa Canada

Akomeza avuga ko hari inshuti ya Jean Baptiste Ajua yagerageje kumurohora ariko akaba yari yamaze gushiramo umwuka. Yarohowe saa kumi na 45 z’umugoroba ahita ajyanwa mu bitaro bya Concordia mu mujyi wa Winnipeg ariko abaganga bahita bemeza ko yamaze gupfa.

Jean Baptiste Ajua yagiye muri Canada muri 2008, muri Mutarama uyu mwaka aba ari bwo yagaragaje ku mbuga nkoranyambaga ko yishimiye cyane kubona ubwenegihugu bwa Canada, none yatabarutse atabashije kumara igihe kinini muri iki gihugu yari yishimiye bihambaye.

Uyu musore kandi yari umuhanga cyane mu mukino wo gusiganwa ku maguru, akaba ari mu baserukiraga igihugu cya Canada mu mikino inyuranye y’amarushanwa yo gusiganwa.

KANDA HANO UREBE VIDEOS UTASANGA AHANDI