Umuyobozi w’ibitaro bya Ruhango yapfuye yenda gukora ubukwe, bikekwa ko yiyahuye

Chief Editor | 6-08-2016
Umuyobozi w’ibitaro bya Ruhango yapfuye yenda gukora ubukwe, bikekwa ko yiyahuye

Dr Niyomugabo Jean Fidèle wari umuyobozi w’ibitaro bya Ruhango biherereye ahitwa i Kinazi, yasanzwe mu cyumba yari acumbitsemo yapfuye aho bikekwa ko yiyahuye, ibi bikaba bibaye mbere y’iminsi micye ngo akore ubukwe kuko yari kuzarongora mu kwezi gutaha.

Amakuru Ikinyamakuru Ukwezi.com gikesha umukozi wa Motel yasanzwemo yapfuye, ashimangira ko Dr Niyomugabo Jean Fidèle w’imyaka 34 y’amavuko yari acumbitse muri Nice Garden Motel iherereye mu kagari ka Gacurabwenge mu murenge wa Byumba, aho bikekwa ko yiyahuje umuti witwa Norotraz agapfa, umurambo ukaba wajyanywe ku bitaro ngo ukorerwe isuzuma.

Hari amakuru yemeza ko Dr Niyomugabo Jean Fidèle yageze muri Nice Garden Motel taliki ya 04 Kanama 2016 mu masaha ya nimugoroba afata icyumba, kuri uyu wa Gatanu tariki 5 ntiyabyuka umunsi wose n’ubwo abakozi ba Nice Garden Motel bakomanze kenshi umunsi wose bashaka gukora amasuku bakabura ubitaba.

Ahagana saa moya za nimugoroba bongeye gukomanga biranga haza kwitabazwa Polisi nayo biranga, nyuma ifata umwanzuro wo kwica urugi basanga yapfuye aniyoroshe apfukiranye, ubu bikaba bikirimo gukurikiranwa.

Dr Niyomugabo Jean Fidèle wayoboraga ibitaro bya Ruhango biri i Kinazi, yari afite ubukwe mu kwezi gutaha kwa Nzeri. Iby’urupfu rwe bikekwa ko ari ukwiyahura, kuko iruhande rw’umurambo we bahasanze imiti ishobora kwica umuntu.

KANDA HANO UREBE VIDEOS UTASANGA AHANDI