Umuyobozi wafatanywe umunyeshuri muri Lodge bakekwaho gusambana yashyikirijwe parike

Chief Editor | 4-09-2016
Umuyobozi wafatanywe umunyeshuri muri Lodge bakekwaho gusambana yashyikirijwe parike

Umuyobozi w’ikigo cy’amashuri cya ES Kigoma giherereye mu karere ka Ruhango mu Ntara y’Amajyepfo akaba n’umwe mu bagize njyanama y’aka karere witwa Kagabo Mansuet, yashyikirijwe parike nyuma yo gufatirwa mu macumbi (Lodge) ari kumwe n’umukobwa w’imyaka 19 y’amavuko, bikekwa ko bari barimo gusambana, agahita atabwa muri yombi.

SP Hitayezu Emmanuel, umuvugizi wa Polisi mu mujyi wa Kigali, mu cyumweru gishize yari yabwiye ikinyamakuru Ukwezi.com ko uwo muyobozi w’ishuri hamwe n’uwo mukobwa wiga ku kigo ayobora, bafatiwe mu macumbi yo mu karere ka Gasabo yitwa Upendo Lodge tariki 28 Kanama 2016, bombi bagahita bafungirwa kuri Sitasiyo ya Polisi ya Remera.

Mu kiganiro SP Emmanuel Hitayezu yagiranye n’ikinyamakuru Ukwezi.com kuri uyu wa Gatandatu, yadutangarije ko uyu muyobozi yamaze gushyikirizwa parike ikaba ari nayo ifite dosiye irimo ibyaha akurikiranweho.

SP Emmanuel Hitayezu, avuga ko ubu pariki yabaye imurekuye ngo imukurikirane adafunze, impamvu yabaye arekuwe ikaba yamenywa n’ubushinjacyaha. Turacyarimo kugerageza kuvugana n’umuvugizi w’ubushinjacyaha, mu gihe baba badutangarije impamvu yabaye afunguwe tukaba twayibagezaho.

Hakurikijwe ingingo ya 244 mu gitabo cy’amategeko ahana ibyaha mu Rwanda, Kagabo Mansuet usanzwe afite umugore basezeranye, ahamye n’icyaha yaba yarakoze ubusambanyi kuko iyi ngingo ivuga ko ubusambanyi ari imibonano mpuzabitsina ikozwe n’uwashyingiwe ku buryo bwemewe n’amategeko, akayikorana n’uwo batashyingiranywe.

Ingingo ya 245 yo ivuga ko umuntu wese uhamwe n’icyaha cy’ubusambanyi, ahanishwa igifungo kuva ku mezi atandatu (6) kugeza ku mwaka umwe (1). Kandi iyi ngingo ihana n’uwo basambanaga, bisobanura ko n’umukobwa ashobora guhanwa cyane ko yujuje imyaka y’ubukure.

KANDA HANO UREBE VIDEOS UTASANGA AHANDI