Uwari umushoferi wa Nyiramasuhuko yageze imbere y’urukiko yigarika nyirabuja

Chief Editor | 24-05-2016
Uwari umushoferi wa Nyiramasuhuko yageze imbere y’urukiko yigarika nyirabuja

Minani Hussein wahoze ari umushoferi wa Nyiramasuhuko Pauline wari Minisitiri w’Iterambere ry’umuryango wakatiwe kubera ibyaha bya Jenoside, yagejejwe imbere y’urukiko kuri uyu wa Mbere tariki 23 Gicurasi 2016, asomerwa ibyaha ashinjwa ariko byose arabihakana.

Saa cyenda z’amanywa yo kuri uyu wa Mbere, nibwo Minani Hussein yagejejwe imbere y’umucamanza bwa mbere kuva yatabwa muri yombi yarigize umunyatanzaniya ndetse yaranahinduye amazina.

Umushinjacyaha yavuze ko Minani yagize uruhare mu bwicanyi butandukanye bwakorewe i Butare hafi y’urugo rwa Paulina Nyiramasuhuko yari abereye umushoferi, aha ngo hakaba hari haranashyizwe bariyeri yicirwagaho abatutsi. Uyu mugabo kandi yasomewe urutonde rurerure rw’abantu yagize uruhare mu rupfu rwabo kimwe n’abo yasambanyirije ku gahato mu rugo rwa Nyiramasuhuko Pauline, ariko ibi byose abitera utwatsi.

Minani yitandukanyije na Nyiramasuhuko wahoze ari nyirabuja, avuga ko Jenoside yabaye batakivuga rumwe, bitewe n’uko bari baramwibye ibyuma byinshi by’imodoka, Nyiramasuhuko akamushinja kubigurisha. Yavuze ko abamushinja ubwicanyi, ari abakoze jenoside bamuziza ko yanze kwifatanya nabo.

Hussein Minani, wari warabonye ubwenegihugu bwa Tanzaniya ku izina rya Hussein Abdi Kitumba Mujandi, yafatiwe i Remera mu karere ka Gasabo ku itaRiki 6 Gicurasi uyu mwaka. Kuba yarahinduye amazina, avuga ko atayobyaga uburari ahubwo akaba yarashakaga kubona ibyangombwa bya Tanzania mu buryo bworoshye.

Minani yemera ko yahoze ari umushoferi wa Nyiramasuhuko Pauline wari Ministri w’Iterambere ry’umuryango wakatiwe n’Urukiko Mpuzamahanga Mpanabyaha rwashyiriweho u Rwanda (ICTR) ariko agahakana uruhare yagize muri Jenoside yakorewe Abatutsi mu 1994

KANDA HANO UREBE VIDEOS UTASANGA AHANDI