Zimwe mu modoka zijya mu ntara zatangiye kubuzwa kugera muri gare ya Nyabugogo

Chief Editor | 19-07-2016
Zimwe mu modoka zijya mu ntara zatangiye kubuzwa kugera muri gare ya Nyabugogo

Gahunda y’umujyi wa Kigali igamije kubahiriza ibijyanye n’igishushanyo mbonera cyo gutwara abantu n’ibintu mu bice bitandukanye by’umujyi, yatangiye kubahirizwa aho zimwe mu modoka zitwara abagenzi zaturukaga mu bice by’intara zatangiye kubuzwa kugera muri gare ya Nyabugogo.

Ibi bimaze iminsi bivugwa cyane, ariko bimwe mu byagiye bivugwa kuri iyi gahunda ni ibinyoma, dore ko hari abagiye bavuga ko imodoka zose zituruka mu Ntara zigomba kubuzwa kugera muri gare ya Nyabugogo, nyamara uko icyemezo cy’Umujyi wa Kigali n’abafatanyabikorwa bawo kimeze, kirareba cyane abagenda mu Ntara y’Uburasirazuba.

Mu kiganiro ikinyamakuru Ukwezi.com cyagiranye na Sibomana Martin ushinzwe itangazamakuru mu mujyi wa Kigali, yabanje guhakana ibyavugwaga ko imodoka zituruka mu Majyepfo no mu bice by’uburengerazuba zizajya zihagarara ku Ruyenzi mu murenge wa Runda wo mu karere ka Kamonyi, naho izituruka mu bice bya Musanze na Rubavu zigahagarara i Shyorongi.

Avuga ko imodoka zose zituruka mu Majyepfo, Amajyaruguru n’ Uburengerazuba, zigomba kuzajya zigera muri gare ya Nyabugogo nk’uko bisanzwe, hanyuma izituruka mu Burasirazuba mu turere nka Gatsibo, Kayonza, Rwamagana, Nyagatare, Kirehe, Ngoma, izituruka muri Tanzania, iziva muri Uganda ziciye ku mupaka wa Kagitumba z’izindi zo muri ibyo bice, zikazajya zihagarara i Kabuga.

Ikindi gice cy’u Burasirazuba bireba ndetse cyo byamaze no kubahirizwa, ni icy’abagenda mu bice bya Bugesera, cyangwa abajya i Burundi baciye muri aka karere. Aba bose kugeza ubu bategera imodoka muri gare ya Nyanza ya Kicukiro.

Sibomana Martin akomeza avuga ko iyi gahunda igamije guca akajagari mu mujyi wa Kigali rwagati, kandi ikaba yaraganiriweho hagati y’ubuyobozi bw’umujyi wa Kigali n’izindi nzego z’abafatanyabikorwa mu bijyanye no gutwara abantu n’ibintu, bikaba byaranamenyeshejwe abo bireba. Mu minsi micye, izigomba guhagara i Kabuga nazo zizatangira gukumirwa muri gare ya Nyabugogo, bivuga ko izikora mu mujyi rwagati ari zo zizajya zigeza abagenzi i Kabuga nk’uko ubu abajya mu Bugesera babanza gutega izibageza i Nyanza ya Kicukiro.

KANDA HANO UREBE VIDEOS UTASANGA AHANDI