MIDIMAR yaba yari izi neza ko Gakenke n’ibindi bice by’u Rwanda bizibasirwa n’ibiza?

Chief Editor | 9-05-2016
MIDIMAR yaba yari izi neza ko Gakenke n’ibindi bice by’u Rwanda bizibasirwa n’ibiza?

Kugeza mu masaha ya saa moya z’umugoroba wo kuri iki cyumweru tariki 8 Gicurasi 2016, imibare ikinyamakuru Ukwezi.com cyahawe na Frederic Nteziryayo ushinzwe itangazamakuru muri Minisiteri ifite gukumira ibiza mu nshingano zayo, ni iy’abantu barenga 49 bahitanywe n’ibiza by’imvura hirya no hino mu gihugu ariko cyane mu Majyaruguru y’u Rwanda.

Mu karere ka Gakenke ari nako kibasiwe cyane, abantu 34 bapfuye, hasenyuka amazu 419, hasenyuka ibiraro n’imihanda 22, naho amatungo 20 y’abaturage arapfa. Mu karere ka Muhanga naho abantu 8 bapfuye, hasenyuka amazu 53. Muri Ngororero hapfuye abantu 3 naho muri Rubavu hapfa abantu 4, mu gihe abakomeretse bari gukurikiranwa n’abaganga, muri rusange ari 26.

Ibi ariko bisa n’ibitaratunguye Minisiteri ifite gukumira ibiza mu nshingano zayo, kuko mu mpera z’umwaka ushize wa 2015 hasohotse ubushakashatsi bwaburiraga iyi Minisiteri n’abaturage muri rusange, ko ibiza by’imvura izateza inkangu bizibasira abaturage bagera kuri 40%

Iki cyegeranyo kibayeho bwa mbere mu Rwanda, kinagaragaza ko abarenga miliyoni ebyiri n’igice (2,500,000) na bo ngo bazagerwaho n’inkubi z’imiyaga ikomeye.

Mu guhanganganana n’icyo kibazo, Leta y’u Rwanda yatangiye gahunda yo kuzafasha kwimuka abatuye mu manegeka no kongera ingufu mu guha abaturage amakuru arebana n’ Ibiza.

Mu gitabo cy’amapaji 191 cyiswe "National Risk Atlas of Rwanda", cyatwaye akayabo k’ibihumbi 635,350 by’amadolari (arenga 500.000.000 z’amafaranga y’u Rwanda) hari hakubiyemo ubushakashatsi bwakozwe kuva mu mwaka wa 2013, bwagaragazaga ko amapfa, inkangu, imyuzure, imitingito, inkubi z’imiyaga ari byo biza bishobora kwibasira igihihu, aho 40% by’abaturarwanga bose byagaragazwaga ko bashobora kwibasirwa n’inkangu, zikiganza mu turere twa Gakenke, Karongi, Muhanga, Ngororero, Nyamagabe, Gicumbi, Nyamasheke, Nyaruguru, Rusizi na Rutsiro.

Miliyoni ebyiri n’ ibihumbi 800 z’abaturage, bo ngo ubushakashatsi bwagaragazaga ko bazagerwaho n’ inkubi z’imiyaga, aba bakiyongeraho abaturiye ibice by’imigezi nka Nyabarongo, Sebeya, Nyabihu, Mukungwa na Kagitumba, byo bizibasirwa n’ imyuzure.

Abakoze ubwo bushakashatsi bavugaga ko amavuriro n’ibindi bikorwa by’ubuvuzi birenga 230, amashuri asaga 140, n’ibilometero bisaga100 by’imihanda byitezwe kwangirika bikomeye.

Ubu bushakashatsi bwashyizwe ahagaragara muri Nzeri, nyuma y’uko hari hashize ibyumweru bibiri ikigo cy’ igihugu cy’iteganyagihe gitangaje mu mezi macye mu Rwanda hazagwa imvura nyinshi, itarahaguye mu myaka 50 ishize.

Minisitiri ushinzwe imicungire y’Ibiza n’impunzi, Seraphine Mukantabana, asobanura zimwe muri gahunda zateganyirijwe guhangana n’ibi biza icyo gihe yagize ati: “Ibyumweru bibiri bishize abatekinisiye mu nzego zitandukanye mu gihugu baricaye bategura icyiswe ‘National Response Plan and Prepareness’, ni ukuvuga ko ubu tuzi ngo turitegura dute gukura abantu mu manegeka, turitegura gute kurohora uwarohamye, turitegura dute kuba abantu batatwarwa n’imisozi,..ikindi giteganyijwe ni uburyo abanyarwanda bagezwaho amakuru badakutse umutima…”

Hakurikijwe iby’ubu bushakashatsi ndetse n’amakuru y’ikigo gishinzwe iteganyagihe, bigaragara ko Minisiteri ibishinzwe yari yarategujwe iby’imvura ikaze mu bice byavuzwe haruguru, kandi n’ubundi abanyarwanda bakaba bakwiye kuba maso ngo hatagira abatungurwa bakongera kwibasirwa.

KANDA HANO UREBE VIDEOS UTASANGA AHANDI