Abagabo bane baguwe gitumo bagerageza guha ruswa abashinzwe umutekano

Chief Editor | 8-08-2016
Abagabo bane baguwe gitumo bagerageza guha ruswa abashinzwe umutekano

Abagabo bane batawe muri yombi mu bihe bitandukanye bakekwaho kugerageza gutanga ruswa ku bashinzwe umutekano nyuma yo gufatirwa mu binyuranyije n’amategeko.

Abdullah Mohamed , Biyondo George William na Rukundo Thierry, bose b’abashoferi bafashwe mu ijoro ryo kuwa Gatandatu tariki 6 Kanama 2016, ku muhanda wa Gicumbi -Gatuna.

Polisi ihakorera ivuga ko batanze amafaranga ari hagati ya 1000 na 2000 mu igenzura ry’ibyangombwa by’imodoka bari batwaye, ryaberaga mu murenge wa Cyumba, mu karere ka Gicumbi, ubu bose bakaba bafungiye kuri sitasiyo ya Polisi ya Byumba mu gihe hagikorwa iperereza.

Mu karere ka Kicukiro kandi, Polisi ihakorera yataye muri yombi uwitwa Bugingo Jean Paul w’imyaka 36, kuri uyu wa Gatandatu ku manywa, agerageza guha ruswa y’amafaranga 200,000 frw , umukozi w’urwego rwa DASSO mu murenge wa Kigarama, mu kagari ka Nyarurama.

Kuri iki gikorwa, umuvugizi wa Polisi y’u Rwanda mu Mujyi wa Kigali, Superintendent Emmanuel Hitayezu yavuze ko uyu mugabo yafashwe mu gihe hakorwaga umukwabu wo kureba abafite inyubako nshya niba bafite ibyangombwa bibemerera kubaka.

SP Hitayezu yagize ati:”Umudasso wari uri mu kazi yasanganye ibyangombwa Bugingo avuga ko yakuye ku karere ka Kicukiro, ariko basanze ari ibihimbano , nibwo yahise ashaka gutanga 200,000 ya ruswa ngo bamureke yikomereze, ahita afatwa ubu akaba afungiye kuri sitasiyo ya Polisi ya Gikondo.”

SP Hitayezu asobanura ko iyi mikorere ku bashinzwe umutekano ari iya kinyamwuga, agakangurira abaturage muri rusange kwirinda gutanga no kwakira ruswa, anabasaba kujya batanga amakuru ku gihe ku kintu cyose kiganisha kuri ruswa n’ibindi binyuranyije n’amategeko.

Yagize na none ati: "Aho gukora ikintu nawe uzi ko kitemewe n’amategeko wizeye ko uri butange ruswa bakakureka, ibyiza wareka gukora icyo kintu kuko nawe bikugiraho ingaruka, ruswa imaze kuba umuziro kandi nta mwanya ifite mu Rwanda no muri Polisi by’umwihariko”

KANDA HANO UREBE VIDEOS UTASANGA AHANDI