Abajenerali barimo Ceasar Kayizari, Sam Kaka, Rwarakabije... basezerewe mu gisirikare

Chief Editor | 12-07-2016
Abajenerali barimo Ceasar Kayizari, Sam Kaka, Rwarakabije... basezerewe mu gisirikare

Igisirikare cy’u Rwanda (RDF) cyasezereye mu cyubahiro aba Ofisiye n’abandi basirikare ku yandi mapeti bose hamwe bagera kuri 775, muri aba hakaba harimo n’abajenerali nka Lt General Ceaser Kayizari, Maj Gen Sam Kaka, Maj Gen Frank Mugambage, Maj Gen Paul Rwarakabije na Brig Gen George Rwigamba

Umuhango wo gusezerera mu cyubahiro ofisiye n’abasirikare b’Ingabo z’u Rwanda bagiye mu kiruhuko cy’izabukuru wabaye ku mugoroba wo ku wa Mbere tariki 11 Nyakanga 2016, uyoborwa na Minisitiri w’Ingabo Gen James Kabarebe nk’uko urubuga rwa Minisiteri y’Ingabo rwabitangaje.

Muri uyu muhango wabereye aho ba Ofisiye bakuru biyakirira ku cyicaro gikuru cy’Ingabo z’u Rwanda , Kimihurura, hari abasirikare bakuru bagiye mu kiruhuko cy’izabukuru baje baherekejwe n’abadamu babo. Hari kandi n’abayobozi bakuru batandukanye bo mu Ngabo z’igihugu bari bitabiriye uyu munsi mukuru.

Abasezerewe muri iki cyiciro cya kane cy’abagiye mu zabukuru bose hamwe ni 775 bagizwe na Ofisiye hamwe n’abasirikare bandi. Mu ijambo yagejeje ku bagiye mu zabukuru Gen Kabarebe yabashimiye ubwitange bagize mu gukorera igihugu.

Yagize ati: “Mu izina ry’Umugaba w’Ikirenga w’Ingabo z’u Rwanda, Nyakubahwa Perezida wa Repubulika, ndagira ngo nshimire abagiye mu kiruhuko cy’izabukuru ku bwitange mwagize mu ntambara yo kubohora igihugu hamwe n’uruhare rwanyu mu iterambere ry’igihugu cyacu. Kwitanga kwanyu niko kwatumye uyu munsi dufite iwacu, u Rwanda, igihugu kiduteye ishema”. 

Minisitiri Kabarebe yasabye ofisiye n’abasirikare bagiye mu zabukuru gukoresha ubunararibonye n’ubumenyi bakuye mu gisirikare bagakomeza guteza imbere igihugu mu bundi buzima bagiyemo.

Lt Gen Ceasar Kayizari wavuze ahagarariye abagiye mu kiruhuko cy’izabukuru, yashimiye ubuyobozi bwa RDF by’umwihariko Umugaba w’Ikirenga w’Ingabo z’u Rwanda, Nyakubahwa Perezida Paul Kagame ku nama n’ indangagaciro mu rugendo rurerure babayemo rwo gukorera igihugu.

Yagize ati: "Twakoze urugendo rurerure rwo kurwanirira igihugu kandi rwari urugendo rw’ingirakamaro, dukorana nk’abantu bashyize hamwe. Ni yo mpamvu dufitanye igihango gikomeye na RDF yatureze, ikadukuza. Aho tuzajya hose ntabwo tuzatatira iki gihango”. Yavuze ko n’ubwo bagiye mu kiruhuko cy’izabukuru, batananiwe bazakomeza gukorera igihugu.

Mu basirikare bakuru basezerewe harimo abo ku rwego rwa Jenerali(Generals) harimo Lt General Ceasar Kayizari; Maj Gen Sam Kaka; Maj Gen Frank Mugambage; Maj Gen Paul Rwarakabije hamwe na Brig Gen George Rwigamba.

Umuhango wo gusezerera abasirikare mu cyubahiro kuri ofisiye bato n’abandi basirikare wabereye kandi mu mitwe y’ingabo bakoreramo.

Kuva mu mwaka wa 2013 bibaye ku nshuro ya 4 RDF isezerera abasirikare binjiye mu zabukuru nkuko biri muri Sitati igenga ingabo z’igihugu. Kuri icyi cyiciro ofisiye hamwe n’abasirikare bandi basezerewe bose hamwe 371 ni abinjiye muri pansiyo y’izabukuru naho 353 bandi bo barangije kontara (contract) mu Ngabo z’u Rwanda. Mu gihe abandi 51 bo basezerewe ku mpamvu z’uburwayi.

KANDA HANO UREBE VIDEOS UTASANGA AHANDI