Abapolisi b’u Rwanda bari mu butumwa bw’amahoro muri Haiti bambitswe imidali

Chief Editor | 18-06-2016
Abapolisi b’u Rwanda bari mu butumwa bw’amahoro muri Haiti bambitswe imidali

Abapolisi b’u Rwanda 160 bari mu butumwa bw’amahoro muri Haiti(MINUSTAH) bari mu mutwe witwa RWAFPU 6, bambitswe imidali ku itariki ya 16 Kamena kubw’akazi bakoze muri iki gihugu.

Aba bapolisi bashimiwe ubufatanye budasanzwe bwabaranze hagati yabo n’abandi bo mu bindi bihugu bari bahujwe n’akazi ndetse n’abaturage mu kurinda umutekano n’amahoro.

Ayobora umuhango wo gutanga imidali, Alexandre Carl, wungirije uhagarariye umunyamabanga mukuru wa Loni muri Haiti yashimye Leta y’u Rwanda ku nkunga yayo mu guha amahoro Haiti n’ahandi ku isi. Yavuze ko ashimishijwe n’akazi kakozwe, ashima cyane ikinyabupfura n’ubunyamwuga bwaranze abapolisi b’u Rwanda mu mwaka w’akazi bahamaze.

Carl Alexander yashimye kandi uruhare rwa RWAFPU muri Haiti mu gufasha Polisi ya Haiti ndetse n’ubufatanye na Polisi ya Loni (UNPOL).

Umuyobozi w’abapolisi b’u Rwanda muri Haiti, Commissioner of Police (CP) Joseph Mugisha, mu ijambo rye, yagize ati: ”Twafashijwe ku ruhande rumwe no kubahiriza indangagaciro za Loni zirimo ubunyamwuga, ubunyangamugayo no kubaha abo mudahuje,..”

CP Mugisha yashimiye abandi bafatanyije inshingano ku bufatanye bwatanze umutekano cyane mu mwaka ushize wari urimo amatora rusange.

Abapolisi b’u Rwanda muri Haiti kandi barashimirwa ibikorwa by’umuganda bahakoreye birimo gusana imihanda, gufasha impfubyi no gutabara abazahajwe n’ibiza nk’umwuzure,… byose byatumye bagira imibanire ikomeye n’abenegihugu.

Polisi y’u Rwanda yatangiye kohereza abapolisi muri iki gihugu kuva mu 2010 kimaze guhura n’akaga k’umutingito wahitanye abarenga 100,000 n’abandi miliyoni eshatu bakava mu byabo.

Inkuru ya RNP

KANDA HANO UREBE VIDEOS UTASANGA AHANDI