Abasirikare bakuru 46 barangije amasomo ajyanye n’ibyo kuyobora ingabo

Chief Editor | 4-06-2016
Abasirikare bakuru 46 barangije amasomo ajyanye n’ibyo kuyobora ingabo

 Abasirikare 46 bo mu rwego rwa ofisiye bakuru barimo abo mu Rwanda no mu bindi bihugu birindwi byo muri Afurika, kuri uyu wa Gatanu barangije amasomo bari bamazemo umwaka biga ibijyanye no kuyobora abasirikare, amasomo yaberaga mu ishuri rikuru rya Gisirikare riherereye i Nyakinama mu karere ka Musanze.

Ibirori byo guhabwa ibihembo byabo byari biyobowe na Minisitiri w’iingabo z’u Rwanda Gen James Kabarebe wari uhagarariye umugaba w’ikirenga w’ingabo z’u Rwanda; Perezida Paul Kagame.

JPEG - 126.5 kb

Mu basirikare 46 bahawe impamyabumenyi, harimo 32 b’abanyarwanda n’abandi 14 baturutse mu bihugu bifitanye ubufatanye n’u Rwanda mu bya gisirikare, buri gihugu muri ibyo birindwi kikaba cyari gihagarariwe n’abasirikare bakuru babiri. Ibyo bihugu ni u Burundi, Kenya, Malawi, Sudani y’Epfo, Uganda, Tanzania na Zambia.

Minisitiri Gen James Kabarebe, yasabye abarangije aya masomo, kubyaza umusaruro ibyo bigishijwe bakabyifashisha mu kazi ka gisirikare mu bihugu byabo no mu karere. Yabasabye kubumbatira ubucuti n’imikoranire, bikagira umusaro mwiza mu mutekano w’ibihugu byabo no mu karere.

JPEG - 131 kb

Gen James Kabarebe kandi yashimiye Perezida Kagame ku ruhare agira mu kubaka igisirikare cy’umwuga kandi gifite imbaraga.

Muri aba basirikare bakuru, uwabaye umunyeshuri mwiza kurusha abandi ni Maj Jean Paul Mutarambirwa w’umunyarwanda, uwa kabiri ni Maj Elias Byamukama wo muri Uganda naho umunya Kenya Maj Paul Aruasa aba uwa gatatu.

JPEG - 127.6 kb

Abandi banyacyubahiro bitabiriye uyu muhango, harimo Minisitiri w’Uburezi, Dr Musafiri Papias Malimba, Minisitiri w’umutekano w’imbere mu gihugu, Sheikh Mussa Fazil Harerimana, Minisitiri mu muryango w’ubumwe bw’ibihugu byo muri Afrika y’Uburasirazuba , Valentine Rugwabiza, umugaba w’ingabo zo muri Czech Republic, General Josef Becvar n’umugaba w’ingabo z’u Rwanda, Gen Patrick Nyamvumba.

KANDA HANO UREBE VIDEOS UTASANGA AHANDI