Agatsiko k’abantu barindwi bataramenyekana kateye ambasade y’u Rwanda

Chief Editor | 19-05-2016
Agatsiko k’abantu barindwi bataramenyekana kateye ambasade y’u Rwanda

Kuri uyu wa Gatatu tariki 18 Gicurasi 2016 mu masaha ya mugitondo, agatsiko k’abantu 7 bataramenyekana kugeza ubu, kateye inyubako ikoreramo ambasade y’u Rwanda mu Bufaransa, barayanduza maze bariruka.

Ikinyamakuru Le Parisien kivuga ko aba bantu binjiye muri ambasade y’u Rwanda bafite imifuka irimo ifu, bakayinyanyagiza mu nyubako ubundi bagahita bahunga bakiruka. Polisi yaratabajwe ariko ntacyo iperereza riragaragaza ku myirondoro y’abakoze ibi n’icyo bari bagamije.

Ibi bikorwa by’urugomo ntawe byagiriye nabi ndetse nta n’ikindi byangije, uretse kuba ifu yanyanyagijwe mu nyubako ikoreramo ambasade y’u Rwanda yarahasize umwanda, ikanatuma haba urwikekwe mu baganaga iyo ambasade n’abakozi bayo batigeze bamenya icyaba kibyihishe inyuma.

Kugeza ubu nta muyobozi w’u Rwanda uragira icyo avuga kuri uru rugomo, gusa ikinyamakuru Le Parisien cyo cyahuje ibyabaye no kuba hari abanyarwanda babiri bahoze ari ba bugurumesitiri barimo gukurikiranwaho ibyaha bya Jenoside muri uyu mujyi wa Paris.
 

KANDA HANO UREBE VIDEOS UTASANGA AHANDI