Bugesera: Umutekamitwe wibye asaga 1.500.000 yizeza abaturage ibitangaza yafashwe

Chief Editor | 20-05-2016
Bugesera: Umutekamitwe wibye asaga 1.500.000 yizeza abaturage ibitangaza yafashwe

Polisi y’u Rwanda mu karere ka Bugesera ifungiye kuri sitasiyo ya Nyamata umugabo witwa Nshamihigo Augustin kubera gushuka abaturage hanyuma akabambura amafaranga y’u Rwanda angana na 1, 520,500.

Umuvugizi wa Polisi y’u Rwanda mu ntara y’Uburasirazuba, Inspector of Police (IP) Emmanuel Kayigi yavuze ko uyu mugabo ufite imyaka 54 y’amavuko yabwiraga abaturage ko hari Ikigo cy’imari giterwa inkunga n’abazungu cyitwa Evangelical and Development Fund (EDF) gitanga inguzanyo ku bantu bakibikijemo amafaranga.

Yongeyeho ko Nshamihigo yabwiraga abaturage ko kugirango umuntu ahabwe inguzanyo agomba kuba amaze nibura amezi atatu akibitsamo ibihumbi icumi by’amafaranga y’u Rwanda buri kwezi.

IP Kayigi yagize ati:"Yabwiraga abo baturage kujya bashyira ayo mafaranga kuri Konti ifite nomero 401120041227 yo muri Equity Bank, no ku yindi yo muri Banki y’abaturage ifite nomero 4083800100011."

Yakomeje agira ati:"Nshamihigo yahaye abo baturage udutabo tugaragaza ko ari abanyamuryango b’icyo Kigo cy’imari cya baringa. Nyuma y’igihe gito, yababwiye kujya bamuzanira ayo mafaranga aho kujya kuyabitsa ubwabo."

IP Kayigi yavuze ko uyu mugabo yafashwe ku itariki 18 Gicurasi amaze kwambura abaturage 25 angana n’amafaranga y’u Rwanda 1, 520,500.

Yagize ati:" Iyo bayamuzaniraga; yabatereraga kashe muri utwo dutabo abasobanurira ko ari gihamya ko ayakiriye, hanyuma akababwira ko namara kuyabitsa azabazanira impapuro zigaragaza ko yayashyize kuri izo Konti; ariko kuva yabitangira; nta n’umwe yigeze azanira urwo rupapuro. "

Asobanura uko yatahuwe, IP Kayigi yagize ati: "Abari bamaze amezi atatu babitsa, baje gusaba inguzanyo nk’uko yari yabibijeje. Uwazaga wese yamubwiraga ko agomba kumuzanira ibyemezo birimo ikigaragaza ko atakatiwe n’inkiko zo mu Rwanda. Ayo mabwiriza yateye abo baturage gukeka ko yaba ari umutekamutwe, maze babibwira Polisi y’u Rwanda muri aka karere."

Mu butumwa bwe, IP Kayigi yagize ati:"Abatekamutwe nk’aba barahari. Abantu bakwiye kubitsa no gusaba inguzanyo mu bigo n’amabanki yemewe mu Rwanda."

Yavuze ko iperereza rikomeje kugirango hamenyekane niba hari abari bafatanyije na we, ndetse na ba nyiri aya makonti yombi.

Nahamwa n’icyaha, Nshamihigo azahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000).

KANDA HANO UREBE VIDEOS UTASANGA AHANDI