Gicumbi: Abashinwa bahondaguye umunyarwanda wabakoreraga bamuhaye 5.000.000

Chief Editor | 6-09-2016
Gicumbi: Abashinwa bahondaguye umunyarwanda wabakoreraga bamuhaye 5.000.000

Abashinwa bari batawe muri yombi bakurikiranweho gukubita umunyarwanda wari umukozi wabo bakamukomeretsa bakamugira intere, bamwishyuye amafaranga y’u Rwanda 5.000.000 banumvikana ko bazakomeza kumuvuza byaba ngombwa bakamuvuza no hanze y’igihugu.

Kuwa Gatandatu tariki 3 Nzeri 2016, nibwo Abashinwa bakora umuhanda mu karere ka Gicumbi bakubise umukozi wabo hafi kumunogonora, ajyanwa kwa muganga avirirana. Uyu wakubiswe yitwa Audace, iwabo hakaba ari mu karere ka Bugesera.

Aba bashinwa bakorera umushinga witwa CHICO (China Henan International Cooperation Group) urimo gukora umuhanda Base - Byumba, uwo bakubise akaba ari umwe mu bahoze ari abakozi babo baherutse kwirukanwa ariko ntibahabwe amafaranga bari barakoreye.

Uwakubiswe yajyanywe kwa muganga yabaye intere

Bijya gutangira, hari abakozi bakoraga akazi k’ubushoferi, baherutse kwirukanwa n’aba bashinwa babashinja kwiba amavuta y’imodoka batwaraga, abo bakozi bakaba baragiye ku biro by’abo bashinwa babakoreshaga, babasaba ko babahemba amafaranga yabo bari barakoreye ariko abandi bababera ibamba, kugeza ubwo umwe muri bo wavugaga ko atahava batamwishyuhe bamukubise bakamuhindura intere.

Bamukomerekeje, ajyanwa kwa muganga avirirana

Amakuru yemejwe na nyirubwite wakubiswe witwa Audace ndetse n’ushinzwe abakozi muri CHICO nawe w’umunyarwanda, ni uko uyu wari wakubiswe yahawe akayabo k’amafaranga y’u Rwanda 5.000.000 y’impozamarira agahita anava mu bitaro akitahira, akaba akomeje kurwarira iwabo mu Bugesera. Bumvikanye kandi ko inkoni yakubiswe nizimuviramo izindi ngaruka, bazamuvuza byaba ngombwa akajyanwa no hanze y’u Rwanda.

N’ubusanzwe ariko, abakorera uyu mushinga w’Abashinwa bavuga ko uburyo bafatwa basanga bibangamira cyane uburenganzira bwabo, dore ko uretse kubakubita bajya banabakorera ibindi birimo kubatuka, kubambura no kubirukana babarenganya.

KANDA HANO UREBE VIDEOS UTASANGA AHANDI