Ingabo z’u Rwanda zatanze inka 20 ku batishoboye barokotse Jenoside

Chief Editor | 1-07-2016
Ingabo z’u Rwanda zatanze inka 20 ku batishoboye barokotse Jenoside

Mu bikorwa biri gukorwa mu cyumweru cy’Ingabo hitegurwa umunsi mukuru wo kwibohora, kuwa gatatu tariki 29 Kamena 2016, Ingabo z’u Rwanda zatanze inka 20 ku batishoboye barokotse Jenoside yakorewe Abatutsi bo mu Karere ka Nyaruguru, mu Ntara y’Amajyepfo.

Umushyitsi mukuru muri uyu muhango yari Guverineri w’Intara y’Amajyepfo, Munyantwari Alphonse ari kumwe n’Umugaba w’Ingabo zigize Divisiyo ya 4 ikorera mu Majyepfo, Gen J.J. Mupenzi, wari uhagarariye ubuyobozi bw’Ingabo z’u Rwanda muri iki gikorwa. 

Mu ijambo Guverineri w’Intara y’Amajyepfo, Munyentwari Alphonse, yagejeje ku bari bitabiriye uwo muhango, yabibukije ko igikorwa cya “Gira Inka Munyarwanda” ari igitekerezo cya Nyakubahwa Perezida wa Repuburika Paul Kagame, akaba n’Umugaba mukuru w’Ikirenga w’Ingabo z’u Rwanda, yagize mu rwego rwo kuzahura ubukungu ku baturage batishoboye.

JPEG - 206.9 kb

Guverineri yakomeje akangurira abaturage bari aho gushimira byimazeyo Umukuru w’igihugu kubera ibikorwa by’indashyikirwa akomeje kugeza ku banyarwanda. Ati: “Ibi bikorwa bidasanzwe yabitangiye kera ubwo yayoboraga urugamba rwo kubohora u Rwanda agahagarika Jenoside yakorewe Abatutsi muri 1994”.

Guverineri Munyentwari yibukije aborojwe gufata neza inka bahawe, kandi bakazirikana ko umutekano u Rwanda rufite ariwo soko ya byose. 

Brig Gen Jean Jacques Mupenzi, uyobora Diviziyo ya 4 ikorera mu Ntara y’Amajyepfo, wari uhagarariye RDF muri iki gikorwa yihanganishije Abacitse ku icumu rya Jenoside yakorewe Abatutsi bo mu Karere ka Nyaruguru, ababwira ko kwigirira icyizere ari bwo buryo bwiza bwo guhangana n’ibibazo umuntu ahura nabyo bya buri munsi mu buzima. Yagize ati: “Ntabwo muri mwenyine, twe nk’Ingabo z’u Rwanda turi kumwe namwe, kandi iki gikorwa kirabagaragariza ko dushishikajwe no kuzamura imibereho yanyu”.

JPEG - 194.1 kb

Umwe mu bacitse ku icumu rya Jenoside yakorewe Abatutsi witwa Kankindi Esperence yabwiye itangazamakuru ko inka ahawe igiye guhindura ubuzima bwe bubi yari abayemo Yagize ati: “Mbere ya Jenoside nanywaga amata, ndashimira cyane Perezida wa Repuburika Kagame Paul n’Ingabo z’u Rwanda, mu minsi iri imbere nzongera nywe amata". 

Ibi bikorwa by’Icyumweru cy’Ingabo byateguwe mu rwego rwo gutegura umunsi mukuru wo kwibohora ku nshuro yawo ya 22, uyu munsi ukaba uzizihizwa ku itariki 4 Nyakanga 2016, mu gihugu hose.

KANDA HANO UREBE VIDEOS UTASANGA AHANDI