Inzu ya Pasteur Bizimungu wari Perezida w’u Rwanda yafashwe n’inkongi - Amafoto

Chief Editor | 11-08-2016
Inzu ya Pasteur Bizimungu wari Perezida w’u Rwanda yafashwe n’inkongi - Amafoto

Inzu y’umuturirwa ya Pasteur Bizimungu wahoze ari Perezida w’u Rwanda yafashwe n’inkongi y’umuriro ariko Polisi ibasha gutabara itarakongoka, impamvu yateye iyi nkongi kugeza ubu ntivugwaho rumwe.

Ni inzu y’ubucuruzi iherereye ku Kacyiru mu mujyi wa Kigali, hepfo ya Top Tower Hotel, hepfo nanone ya ambasade y’Abaholandi mu Rwanda. Iyi nzu ikorerwamo ibikorwa by’ubucuruzi bitandukanye, yahiye igice kimwe cyari kibitsemo ibikoresho byo mu biro nka za mudasobwa n’impapuro zitandukanye, aho byari biri bikaba byangiritse uko byakabaye.

Gusa ubwo ikinyamakuru Ukwezi.com cyahageraga, ishami rya Polisi y’u Rwanda rishinzwe kuzimya inkongi z’umuriro bari barimo kuzimya kugirango bitagera mu bindi bice by’inyubako. Kubera ubutabazi bwa Polisi, ntabwo iyi nkongi yangije cyane iyi nyubako.

Umwe mu bakozi baho, yabwiye Ukwezi.com ko umusore wasudiraga kuri iyo nyubako bikekwa ari we waba wabaye intandaro y’iyi nkongi, gusa we arabihakana akavuga ko ntaho ahuriye nabyo. Polisi nayo ivuga ko ari byo ikeka ariko iracyakora iperereza ngo hamenyekane impamvu nyayo y’inkongi.

Ibitangijwe n’umuriro byanijwe n’amazi yakoreshejwe mu kuzimya

Polisi yatabaje inzu itarakongoka yose

Iyi ni inzu ya Pasteur Bizimungu ariko siyo abamo. Aha ni ahatagize icyo haba

Igice cyahiye cyatikiriyemo mudasobwa n’ibikoresho byinshi byakongotse

Pasiteri Bizimungu yaje kugera kuri iyi nzu ye, abwira ikinyamakuru Ukwezi.com ko byabaye yagiye muri siporo atanafite telefone hafi ye ari nayo mpamvu yatinze kubimenya, gusa avuga ko inzu ye isanzwe ifite ubwishingizi muri Radiant kuburyo ibyangijwe bigomba kwishyurwa.

Pasiteri Bizimungu aha yari ageze ku nzu ye yahiye, yavuze ko isanzwe ifite ubwishingizi.

KANDA HANO UREBE VIDEOS UTASANGA AHANDI