Kamonyi: Impanuka ikomeye yatikiriyemo ubuzima bw’abantu

Chief Editor | 19-10-2016
Kamonyi: Impanuka ikomeye yatikiriyemo ubuzima bw’abantu

Mu masaha y’umugoroba wo kuri uyu wa Gatatu tariki 19 Ukwakira 2016, impanuka ikomeye yabereye i Musambira mu karere ka Kamonyi, abantu benshi bakaba bahasize ubuzima abandi batari bacye nabo barakomereka.

Imodoka ya kompanyi ya Horizon Express ifite ibirango RAB 183 U yerekezaga i Kigali ivuye i Nyanza, yagonganye n’ikamyo T957DBT yavaga muri Tanzania, iyi mpanuka ikaba yabereye ahitwa i Musambira mu karere ka Kamonyi.

Amakuru ikinyamakuru Ukwezi.com gikesha abari hafi y’ahabereye iyi mpanuka, ahamya ko babonye abantu benshi bayiguyemo ndetse imodoka ya Coaster ikaba yangiritse cyane, bigaragaza ubukana bw’impanuka. Uretse abari mu modoka, hari n’abanyamaguru bagonzwe n’izo modoka zombi zagonganye.

Mu gitondo cyo kuri uyu wa Kane tariki 20 Ukwakira 2016, Umuvugizi w’ishami rya Polisi y’u Rwanda rishinzwe umutekano wo mu muhanda, CIP Emmanuel Kabanda yabwiye ikinyamakuru Ukwezi.com ko kugeza ubu abantu 11 ari bo bamaze kuhasiga ubuzima mu gihe abandi bagera kuri 18 bakomeretse. Hari abari mu modoka hakabamo n’abanyamaguru bari hafi aho.

Abapfuye n’abakomeretse bagejejwe mu bitaro bya Kabgayi, mu gihe iperereza rikomeje ngo hamenyekane mu by’ukuri icyaba cyateye iyi mpanuka. Imodoka itwara abagenzi yari irimo abantu bagera kuri 27, aba bose abatapfuye bakaba bakomeretse.

KANDA HANO UREBE VIDEOS UTASANGA AHANDI