Kigali: Umukobwa yiyahuye asimbuka umuturirwa wa ahita apfa

Chief Editor | 25-07-2016
Kigali: Umukobwa yiyahuye asimbuka umuturirwa wa ahita apfa

Mu ijoro ryo kuri iki Cyumweru tariki 24 Nyakanga 2016, umukobwa yiyahuye asimbuka umuturirwa wa Kaminuza yigenga ya Kigali izwi nka ULK iherereye ku Gisozi mu mujyi wa Kigali ahita apfa.

Amakuru agera ku kinyamakuru Ukwezi.com, avuga ko uyu mukobwa bitaramenyekana neza imyirondoro ye cyane ko ugiye kwinjira muri iyi Kaminuza kimwe n’ahandi henshi hatandukanye, abanza gusiga ibyangombwa bye ku muryango, uyu nawe hakaba hataraboneka ikimuranga. Aya makuru akomeza ashimangira ko yasimbutse mu nyubako kuri etaji (etage) ya kane akagwa hasi agahita ashiramo umwuka.

Nk’uko byemejwe n’umuvugizi wa Polisi y’u Rwanda mu mujyi wa Kigali, Sup Hitayezu Emmanuel, uyu mukobwa yamaze guhanuka muri etaji y’iyi nyubako ahita ajyanwa ku bitaro bya CHUK ariko agerayo yamaze gushiramo umwuka. Sup Hitayezu avuga ko Polisi ikirimo gukorana n’ubuyobozi bwa Kaminuza yigenga ya Kigali, ngo hashakishwe umwirondoro we hanamenyekane niba yari umunyeshuri cyangwa ari undi muntu wigenderaga.

Turakomeza kubakurikiranira iby’iyi nkuru tukaza kubibagezaho uko byakabaye mu gihe kitarambiranye.

KANDA HANO UREBE VIDEOS UTASANGA AHANDI