Kigali: Yakase ijosi mugenzi we mu ruhame akoresheje icyuma aramwica

Chief Editor | 11-10-2016
Kigali: Yakase ijosi mugenzi we mu ruhame akoresheje icyuma aramwica

Ku mugoroba wo kuri uyu wa Mbere tariki 10 Ukwakira 2016, umugabo wo mu karere ka Kicukiro mu mujyi wa Kigali yakase ijosi mugenzi we akoresheje icyuma, akaba yamwiciye mu ruhame abantu bareba. Bivugwa ko uyu wishe mugenzi we yaba yari yasinze inzoga z’inkorano.

Ubu bwicanyi bwabereye mu kagari ka Gako, mu murenge wa Masaka wo mu karere ka Kicukiro mu mujyi wa Kigali. Abari aho ibi byabereye batangarije ikinyamakuru Ukwezi.com ko uwakebwe ijosi yari asanzwe akanika amagare muri santeri ya Masaka naho uwamwishe akaba yari asanzwe apima urwagwa mu kabari kari hafi aho.

Umwe muri bo yadutangarije ko uwo upima urwagwa hari undi babanje kurwana, uwo wishwe abasaba ko bareka kurwanira ku iseta akanikiraho amagare maze bituma nawe bamwibasira umwe ahita amukeba ijosi akoresheje icyuma yari afite.

Amakuru y’ubu bwicanyi yemejwe na SP Emmanuel Hitayezu, umuvugizi wa Polisi y’u Rwanda mu mujyi wa Kigali. Yatangarije ikinyamakuru Ukwezi.com ko ku isaha ya saa kumi n’imwe n’iminota 40 z’umugoroba, ari bwo umusore witwa Twagirayezu Emmanuel yateye icyuma mugenzi we witwa Twizeyimana w’imyaka 21 agahita agwa aho, umurambo we ukaba wajyanywe ku bitaro bya Kacyiru, naho uwamwishe akaba afungiwe kuri Sitasiyo ya Polisi ya Masaka.

SP Hitayezu avuga ko amakuru Polisi yahawe n’abaturage, ashimangira ko Twagirayezu Emmanuel yari yasinze inzoga z’inkorano zitemewe mu Rwanda, gusa Polisi nayo ikaba yatangiye iperereza ngo intandaro y’ubu bwicanyi imenyekane.

KANDA HANO UREBE VIDEOS UTASANGA AHANDI