Kirehe: Umugabo ukekwaho gukwirakwiza ibiyobyabwenge, yafatanywe ibiro 8 by’urumogi

Chief Editor | 11-07-2016
Kirehe: Umugabo ukekwaho gukwirakwiza ibiyobyabwenge, yafatanywe ibiro 8 by’urumogi

Umugabo ucyekwaho gukwirakwiza ibiyobyabwenge yafatiwe mu karere ka Kirehe mu rukerera rwo ku itariki 9 Nyakanga. Uwitonze Cassien, ufite imyaka 42 y’amavuko ni we ukurikiranyweho gukora iki cyaha, akaba yarafatanywe ibiro umunani by’urumogi.
 
Afungiwe kuri sitasiyo ya Polisi y’u Rwanda ya Kirehe, ndetse n’urwo rumogi yafatanywe ni ho ruri mu gihe iperereza rikomeje.
 
Umuvugizi wa Polisi y’u Rwanda mu Ntara y’Iburasirazuba, Inspector of Police (IP) Emmanuel Kayigi yavuze ko Uwitonze yafatiwe ku muhanda wa kaburimbo mu kagari ka Cyunuzi, ho mu murenge wa Gatore amaze kwinjira mu modoka yavaga i Nyakarambi yerekeza i Kigali.
 
Asobanura uko yafashwe, IP Kayigi yagize ati,"Ubwo shoferi w’iyo modoka yarimo atunganya imitwaro y’abagenzi; yageze ku wa Uwitonze yumva urakomeye, maze akeka ko harimo urumogi. Yahise abimenyesha Polisi y’u Rwanda, maze ije isanga koko umutwaro we urimo ibiro umunani by’urumogi, ihita imufata."
 
IP Kayigi yashimye uwatanze ayo makuru yatumye Uwitonze afatanwa urwo rumogi , kandi akangurira abandi batwara ibinyabiziga kujya bagira amakenga kugira ngo bataba icyanzu abatunda ibiyobyabwenge bacamo igihe babivana ahantu runaka babijyana ahandi.
 
Yakomeje avuga ko ifatwa ry’uru rumogi ndetse n’ibindi biyobyabwenge ryatewe n’ingamba yafashe zirimo ibikorwa byo gufata ababyishoramo, ubukangurambaga bwo kubyirinda bukorwa mu mashuri no mu muryango nyarwanda mugari, ibi bikiyongeraho uruhare rw’abagize Komite zo kwicungira umutekano (Community Policing) no guhanahana amakuru ku gihe.
 
Avuga ku ngaruka zo kwishora mu biyobyabwenge, IP Kayigi yasobanuye ko urumogi, kimwe n’ibindi biyobyabwenge bitera ababinyoye gukora ibyaha birimo gukubita no gukomeretsa, ubujura, n’ihohoterwa rishingiye ku gitsina.
 
Yakomeje agira ati,"Na none kubishoramo amafaranga ni ukuyangiza kuko iyo bifashwe birangizwa, uwabifatanywe agafungwa, kandi agacibwa ihazabu."
 
Yagiriye abantu inama yo kunywa no gucuruza ibintu byemewe n’amategeko kandi bidafite ingaruka mbi ku buzima bwabo, kandi abasaba gukomeza gutanga amakuru ku gihe y’abakora ibyaha muri rusange.
 
Nahamwa n’icyaha, Uwitonze azahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000) nk’uko biteganywa n’ingingo ya 594 yo mu gitabo cy’amategeko ahana ibyaha mu Rwanda.

KANDA HANO UREBE VIDEOS UTASANGA AHANDI