Maj. General Rutatina wirukanywe ku buyobozi bw’iperereza rya gisirikare yahawe ikiruhuko

Chief Editor | 13-10-2016
Maj. General Rutatina wirukanywe ku buyobozi bw’iperereza rya gisirikare yahawe ikiruhuko

Kuri uyu wa Gatatu tariki 12 Ukwakira 2016, Nyakubahwa Perezida wa Repubulika y’u Rwanda, Paul Kagame, ashingiye ku bubasha ahabwa n’amategeko yamenyesheje Inama y’Abaminisitiri ko yemereye Major-General Richard RUTATINA na Major Issa KARAMAGE kujya mu kiruhuko cy’izabukuru. Maj. Gen Rutatina ni umwe mu basirikare bamenyekanye cyane mu ngabo z’u Rwanda.

Maj. Gen Richard Rutatina, yavuzwe cyane muri 2012 ubwo yari mu basirikare bafungiwe mu ngo zabo ubwo bakekwagwaho kugira imyitwarire mibi "indisicipline" no gukorana ubucuruzi butemewe n’abasivile, ubucuruzi byavugwaga ko bukorerwa muri Repubulika Iharanira Demokarasi ya Kongo.

Icyo gihe yari afite ipeti rya Brigadier General, mbere y’uko afungirwa mu rugo rwe, akaba yari akuriye iperereza mu gisirikare (DMI). Mu mpera z’umwaka ushize wa 2015, Maj Gen Richard Rutatina yongeye kugirwa Umuyobozi Mushya wa J2 (Benshi bita DMI – Directorate of Military Intelligence), Urwego rw’Ubutasi bwa Gisirikare.

Maj Gen Richard Rutatina akaba yarirukanwe kuri uyu mwanya w’ubuyobozi bwa J2, muri Gashyantare uyu mwaka wa 2016, nyuma y’amezi macye ubu akaba yavuye mu gisirikare akajya mu kiruhuko cy’izabukuru.

KANDA HANO UREBE VIDEOS UTASANGA AHANDI