Manishimwe, Dusabimana na Uzamuhoza bafatanywe udupfunyika 2050 tw’urumogi

Chief Editor | 29-05-2016
Manishimwe, Dusabimana na Uzamuhoza bafatanywe udupfunyika 2050 tw’urumogi

Polisi y’u Rwanda ikorera mu karere ka Rutsiro, kuwa Kane tariki ya 26 Gicurasi 2016 yakoze umukwabu ifatana abantu batatu udupfunyika 2050 tw’urumogi, ikana yarabafatiye mu murenge wa Nyabirasi. Abafashwe ni Manishimwe Merci , Dusabimana Vestine na Uzamuhoza Florence, ubu bafungiye kuri Sitasiyo ya Polisi ya Kivumu.

Umuvugizi wa Polisi mu ntara y’Uburasirazuba, Chief Inspector of Police (CIP) Theobald Kanamugire yagize ati:”Twahawe amakuru n’abaturage ko hari abantu bashobora kuba binjije urumogi muri Rutsiro barukuye mu karere ka Rubavu, natwe twihutira kubashakisha kandi twabafashe.”

CIP Kanamugire yaboneyeho umwanya wo gushimira abo baturage batanze amakuru, avuga ko bagira uruhare rukomeye mu gukumira no kwirinda ibyaha bitandukanye, abasaba gukomeza aho bakorana neza n’inzego zishinzwe umutekano.

Aha yagize ati:”Ifatwa ry’aba bantu ryatewe n’imikoranire myiza dufitanye n’ibyiciro bitandukanye by’abaturage, harimo komite zo kwicungira umutekano, urubyiruko, abacuruzi, abavuga rikumvikana, n’abayobozi b’inzego z’ibanze.Ubu buryo bumaze gutanga umusaruro ugaragara, kuko ubona ko abaturage bamaze kumenya uruhare rwabo mu kwicungira umutekano.”

Polisi yakomeje gushishikariza abaturage gukumira ibyaha, ikabakangurira gutanga amakuru ku gihe y’ikintu cyose cyahungabanya umutekano w’aho batuye. CIP Kanamugire ati: ”Aba 3 bakekwa bafashwe kubera amakuru twahawe n’abaturage, kandi ubu amakuru menshi tubona y’abacuruza n’abanywa urumogi tuyahabwa nabo.”

Yaboneyeho umwanya wo gusaba abantu bose bishora mu bikorwa nk’ibi kubireka kuko aho baba bari hose bazafatwa bagashyikirizwa ubutabera. Aha yagize ati:”Ibikorwa nk’ibi bishyira ubikora mu kaga kandi byakwirindwa. Turabasaba kubivamo bagafatanya na Polisi n’izindi nzego z’umutekano nabo bakaba abafatanyabikorwa mu gucunga umutekano w’igihugu.

Ingingo ya 594 yo mu gitabo cy’amategeko ahana ibyaha mu Rwanda, ivuga ko umuntu wese ukora, uhindura, winjiza, ugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko, ahanishwa igifungo kuva ku myaka itatu (3) kugeza ku myaka itanu (5) n’ihazabu y‟amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000).

KANDA HANO UREBE VIDEOS UTASANGA AHANDI