Muhima: Imodoka eshanu na moto byagonganye

Chief Editor | 10-06-2016
Muhima: Imodoka eshanu na moto byagonganye

Mu masaha y’igicamunsi cyo kuri uyu wa Gatanu tariki 10 Kamena 2016, ku Muhima mu mujyi wa Kigali, habereye impanuka y’imodoka yasubiye inyuma ikagonga izindi enye ndetse na moto imwe.

Aya makuru yemejwe na Sup Jean Marie Vianney Ndushabandi, umuvugizi w’ishami rya Polisi y’u Rwanda rishinzwe umutekano wo muhanda, akaba yatangarije ikinyamakuru Ukwezi.com ko iyi mpanuka yatewe n’umushoferi wahagaritse imodoka ntashyiremo feriyamu (Frein à main) bigatuma isubira inyuma igatuma izindi enye na moto bigongana.

Iyi ni imodoka itwara indembe yari ije gutabara abakomeretse ngo ibajyane kwa muganga

Imwe muri izi modoka yanabirindutse igwa mu muferege, gusa Sup Ndushabandi avuga ko n’ubwo imodoka zangiritse nta muntu wapfuye, ariko hakaba hakomeretse cyane abantu babiri bahise bajyanwa kwa muganga. Abari aho iyi mpanuka yabereye, babwiye Ukwezi.com ko abajyanywe kwa muganga bakomeretse cyane kuburyo icyizere cyo gukira ari gicye.

Iyi ni impanuka ya kabiri yabaye mu mujyi wa Kigali kuri uyu wa Gatanu, nyuma y’indi yabereye ku Kicukiro igahitana abantu 7, hagakomereka 9 ndetse hakanangirika imodoka 12.

KANDA HANO UREBE VIDEOS UTASANGA AHANDI