Musanze: Umugabo yafatanywe gerenade n’icyuma cya gisirikare byari mu buriri bwe

Chief Editor | 21-09-2016
Musanze: Umugabo yafatanywe gerenade n’icyuma cya gisirikare byari mu buriri bwe

Polisi y’u Rwanda ikorera mu karere ka Musanze yataye muri yombi umugabo witwa Nzabonimana Jean Bosco imukurikiranyeho icyaha cyo gutunga intwaro mu buryo butemewe n’amategeko. Ni nyuma yo kumufatana gerenade n’icyuma cya gisirikare kizwi ku izina rya Bayonet.

Uyu mugabo usanzwe utuye mu murenge wa Muhoza mu karere ka Musanze, yatawe muri yombi ubu akaba afungiwe kuri sitasiyo ya Polisi ya Muhoza. Yafashwe nyuma y’uko umugore we atanze amakuru ko umugabo we afite gerenade n’icyuma cya gisirikare, avuga ko yabisanze munsi ya matora bararagaho.

Nzabonimana Jean Bosco wahoze ari umusirikare mu ngabo z’u Rwanda, ngo yari amaze igihe afitanye ibibazo n’umugore we ndetse ubuyobozi bw’umurenge wa Muhoza bushimangira ko ku Cyumweru uyu mugore yari yahunze umugabo we nyuma yo kubwirwa ko ari bumwice. Ibi byemezwa na Sebashotsi Jean Paul, umunyamabanga Nshingwabikorwa w’umurenge wa Muhoza.

Ingingo ya 671 mu gitabo cy’amategeko ahana ibyaha mu Rwanda, ivuga ko umuntu wese utunga intwaro, uyitiza, uyitanga, uhindura ibimenyetso byayo mu buryo ubwo ari bwo bwose, ahanishwa igifungo kuva ku mezi atandatu (6) kugeza ku mwaka umwe (1) n’ihazabu y’amafaranga y’u Rwanda kuva ku bihumbi magana atatu (300.000) kugeza kuri miliyoni eshatu (3.000.000) cyangwa kimwe gusa muri ibyo bihano.

KANDA HANO UREBE VIDEOS UTASANGA AHANDI