Nyamata: Umugabo yatemaguye umusore yashinjaga kumusambanyiriza umugore aramwica

Chief Editor | 7-06-2016
Nyamata: Umugabo yatemaguye umusore yashinjaga kumusambanyiriza umugore aramwica

Mu ijoro ryo ku Cyumweru tariki 5 Kamena 2016, umugabo witwa Nkundimana Eric yategamaguye umusore witwa Biziyaremye Tharcisse yakekagaho kumusambanyiriza umugore, nyuma yo kumwica atema n’abandi barimo uwo mugore we ariko bo ntiyabica.

Ibi byabereye mu murenge wa Nyamata wo mu karere ka Bugesera mu Ntara y’Uburasirazuba, umuvugizi wa Polisi y’u Rwanda muri iyi ntara, IP Emmanuel Kayigi, akaba yatangarije ikinyamakuru Ukwezi.com ko Nkundimana n’umugore we kimwe na Biziyaremye bari abapagasi, bakaba bari bamaze igihe gito bacumbitse i Nyamata.

Nkundimana yaguriye inzoga umusore yakekagaho kumusambanyiriza umugore, ayijyana mu rugo basangira n’umugore we ndetse na nyir’amazu bari bacumbitsemo, ariko abikora agamije kwiyegereza uwo musore witwa Biziyaremye ngo aze kubona uko amwica.

IP Kayigi akomeza avuga ko igihe cyaje kugera Nkundimana Eric akajya mu nzu akazana umuhoro bazi ko yikinira, yasohoka agatemagura Biziyaremye Tharcisse akamwica yarangiza akanatema umugore we ndetse na nyir’amazu bari bacumbitseho ariko bo bagakomereka ntibapfe.

Abantu benshi bahise bahurura, Nkundimana Eric aratoroka ariruka ariko bucyeye kuri uyu wa Mbere aza kwishyikiriza Sitasiyo ya Polisi ya Nyamata ari naho afungiwe kugeza ubu, mu gihe umurambo w’uwo yishe kimwe n’abakomeretse bari bakiri mu bitaro bya ADEPR biri i Nyamata.

KANDA HANO UREBE VIDEOS UTASANGA AHANDI