Nyamirambo: Ikintu cy’amayobera cyaturikanye umuntu mu kigo cy’ababikira

Chief Editor | 16-09-2016
Nyamirambo: Ikintu cy’amayobera cyaturikanye umuntu mu kigo cy’ababikira

SP Hitayezu Emmanuel, umuvugizi wa Polisi mu mujyi wa Kigali

Mu masaha ya mu gitondo cyo kuri uyu wa Gatanu tariki 16 Nzeri 2016, ikintu kitarasobanuka neza cyaturikanye umuntu mu kigo cy’ababikira i Nyamirambo mu mujyi wa Kigali, aho bakunda kwita mu babikira b’aba Carmel. Ibi byabaye mu masaha ya saa yine za mugitondo.

Aya makuru yemejwe na SP Hitayezu Emmanuel, umuvugizi wa Polisi y’u Rwanda mu mujyi wa Kigali, akaba yatangarije ikinyamakuru Ukwezi.com ko muri iki kigo cy’ababikira hari ikimoteri cya metero 12 gisukwamo imyanda ariko bagashyiramo n’amazi, kuri uyu wa Gatanu bakaba bashyiragamo aside bita "Carbure" ituma imyanda imanuka hasi, hanyuma umukozi wabikoraga aza no kujugunyamo ikibuye, ikintu gihita giturika cyane uwo n’umwotsi uracumba.

SP Hitayezu avuga ko n’ubwo hari abaketse ko icyaturitse cyaba ari gerenade, ibi bitahita byemezwa kuko uwo cyaturikanye cyamutwitse mu maso bigaragara ko yangiritse mu isura, umuganga urimo kumukurikirana mu bitaro bya CHUK akaba avuga ko abona bimeze nk’ubushye.

Kugeza ubu ntiharemezwa mu buryo budakuka icyaba cyaturikanye uwo muntu, Polisi ikorera mu mujyi wa Kigali ikaba ikomeje gukora iperereza ngo hamenyekanye mu by’ukuri icyaturitse n’impamvu yabyo.

KANDA HANO UREBE VIDEOS UTASANGA AHANDI