Nyuma yo gukubitagura umugore w’umuzunguzayi, umu DASSO yatawe muri yombi - VIDEO

Chief Editor | 20-09-2016
Nyuma yo gukubitagura umugore w’umuzunguzayi, umu DASSO yatawe muri yombi - VIDEO

Dasso zikunze kuvugwaho kugira urugomo no guhohotera rubanda. Foto: Internet

Munyemana Jean Paul, umukozi w’urwego rwa DASSO mu karere ka Nyarugenge mu mujyi wa Kigali, afungiye kuri sitasiyo ya Polisi ya Nyarugenge azira gukubita no gukomeretsa umugore w’umuzunguzayi.

Kuri uyu wa Mbere tariki 19 Nzeri 2016, nibwo ku mbuga nkoranyambaga hakwirakwijwe amashusho y’umukozi w’urwego rwa DASSO mu karere ka Nyarugenge wakubise umugore w’umuzunguzayi, uburyo yamuhondaguye imigeri bikaba byaragawe na benshi.

Amakuru yemezwa n’umuvugizi wa Polisi y’u Rwanda mu mujyi wa Kigali, SP Emmanuel Hitayezu, ashimangira ko uyu mukozi w’urwego rwa DASSO ubu afungiye kuri sitasiyo ya Polisi ya Nyarugenge mu mujyi wa Kigali.

Aramutse ahamwe n’icyaha, Munyemana Jean Paul n’ingingo y’148 mu gitabo cy’amategeko ahana y’u Rwanda. Iyi ngingo igena ko umuntu wese ubishaka, ukomeretsa undi cyangwa umukubita cyangwa umusagarira ku buryo bwa kiboko bubabaje, ahanishwa igifungo kuva ku mezi atandatu (6) kugeza ku myaka ibiri (2) n’ihazabu y’amafaranga y’u Rwanda kuva ku bihumbi ijana (100.000) kugeza ku bihumbi magana atanu (500.000) cyangwa kimwe gusa muri ibyo bihano.

REBA VIDEO Y’IBYO UYU DASSO YAKOZE HANO:

KANDA HANO UREBE VIDEOS UTASANGA AHANDI